Iniciativa tresllada de manera formal la ufierta d'un cursu pa diputaos y trabayadores de la Xunta

Solicita al presidente Marcelino Marcos un espaciu nel Parllamentu pa desendolcalu.

Iniciativa pol Asturianu quier ameyorar la capacidá y sensibilidá llingüística de los representantes de la sociedá asturiana y de los trabayadores de la Xunta Xeneral, polo que va treslladar de manera formal la ufierta avanzada tres l'aprobación de la modificación del Reglamentu de la Cámara de poner clases d'asturianu. Va facela llegar a tolos grupos parllamentarios, asina como al propiu Marcos.

El cursu daría unes nociones básiques d’asturianu a los diputaos y el personal de la Xunta Xeneral que nun conoza bien l'idioma, amás d’esplicar con detalle la situación sociollingüística y llegal de la llingua asturiana. "Ye una propuesta que quier sensibilizar a los grupos políticos y adientrar a los diputaos y diputaes na llingua qu’usen cada día munchos de los ciudadanos a los que representen y tamién dellos de los diputaos al espresase na actividá parllamentaria", esplica'l coleutivu.

Na semeya, Marcos preside un Plenu de la Xunta Xeneral.