“Indiscutiblemente hai un avance oxetivu del asturianu na población” asegura Llera Ramo

Francisco José Llera Ramo, autor del estudiu ‘Conocimientu del asturianu nos ámbitos urbanos: Uviéu, Xixón y Avilés’, encargáu pola Academia de la Llingua Asturiana (ALLA), presentó esti martes l’avance de datos que-y permite concluyir que “indiscustiblemente hai un avance oxetivu del asturianu na población” al comparalos colos d’otru práuticamente idénticu del 1991. “Esto ye un pequeñu milagru que se caltién, con dalguna ayudina, pola voluntá de los falantes”, afirmó.

En compañía de Xose Antón González Riaño, presidente de l’ALLA, el caderalgu de Ciencia Política y de l'Alministración de la Euskal Herriko Unibertsitatea (UPV-EHU) y académicu recordó que “ésta ye la octava encuesta sociollingüística que facemos en 30 años”, trés décades “buscando esplicaciones, analizando situaciones, viendo actitúes, consumos, práutiques… Y nesti casu conocimientu”.

La primera foi, nel 1990, de consumos de publicaciones n’asturianu encargada pola Conseyería de Cultura, a la que siguió, nel 1991 la primera sociollíngüística “qu’agora tamos replicando: intentar facer una especie d’esame d’asturianu a los asturianos”. Llera esplicó que “naquella ocasión fíximosla a tola población asturiana y nésta teníemos esa opción tamién, pero a l’Academia importaba-y saber qué ta pasando nos trés centros urbanos principales aplicando la mesma metodoloxía y práuticamente’l mesmu cuestionariu llingüísticu, fechu por llingüistes de la universidá, y replicando na mayoría de los posible’l del añu 91 con dalguna matización mui pequeña, pa saber qué ta pasando nel área metropolitana”.

500 encuestes

Fixéronse en total 500 entrevistes a domiciliu a mayores de 16 años, “una muestra suficiente que nos da un marxe d’error pal conxuntu d’unos 4 puntos”, ente’l 17 de xineru y el 11 de febreru d’esti mesmu añu, con representividá de tolos grupos d’edá y de xéneru. 192 realizáronse n’Uviéu, 240 en Xixón y 60 n’Avilés, con entrugues sobre fenómenos fónicos, fenómenos léxicos, y fenómenos morfolóxicos y sintácticos, que sirven pa conocer la maña llingüística del encuestáu, y aspeutos sociollingüísticos.

“Indiscustiblemente hai un avance oxetivu del asturianu na población”, avanzó Llera Ramo enantes d’afondar nos resultaos del estudiu. Llueu concluyiría que “amos, a vista de los datos, sobre manera los llingüísticos, que son los que nos interasaben, énte un recuperación sólida clarísimamente, anque pendiente del avance de la normalización”.

Un avance que se produz “nun contestu enllenu de dificultaes pa la normalización”, polo que convidó a reflexonar: “Imaxinémonos nuna situación de normalización plena. Esto ye un pequeñu milagru que se caltién, con dalguna ayudina, pola voluntá de los falantes. Les llingües caltiénense pola voluntá de los falantes. Si l’asturianu se caltién vivu y avanza ye porque los falantes quiérenlu vivu, independientemente de que pasen xeneraciones, pase’l tiempu, haya cambios sociales y movilidá de la población”.

D'ente'l 18 y el 20 por cientu

"Hai un claru ameyoramientu en toles dimensiones. Nun hai nenguna qu'empeore y namái una caltiénse estable", apunta Llera al facer balance de la evolución del 1991 al 2023 no que se refier a la capacidá llingüística de la población. "L'avance mediu del conxuntu podemos asitialu ente'l 18 y el 20 por cientu", confirmó, pa depués recordar que va 22 años túvose en cuenta tola población y equí la que vive nes trés mayores zones urbanes, dexando fuera llugares onde l'asturianu tien una gran vitalidá, como les cuenques.

Sobre los motivos d'esti datu positivu apuntó sobre manera a "la escolarización", pero amás citó "el meyor tratu institucional, que tamién ayuda; la mayor presencia lliteraria; los avances culturales; la movilización coles oficines de normalización llingüística municipales en dalgunos llugares; y el movimientu ciudadanu. Son les claves.

Na semeya, González Riaño y Llera Ramo miren el cartafueyu col avance de datos del estudiu.