El 89,2 por cientu de los encuestaos quier al idioma na escuela

Éstos son los resultaos de la segunda parte, la suxetiva, del estudiu ‘Conocimientu del asturianu nos ámbitos urbanos: Uviéu, Xixón y Avilés’ de l'Academia de la Llingua Asturiana.

El puntu 8 del estudiu fechu por Francisco José Llera Ramo centróse na escolarización, con un "apoyu cuasi unánime de la presencia del asturianu nes escueles". Asina, un 59 por cientu considera que "ha estudiase como una asignatura de calter cultural" y un 30,2 por cientu como "una asignatura normal más (igual que'l gallegu, por exemplu), sumando ente les dos un 89,2 por cientu, pol 8,6 por cientu que cree que "nun ha estudiase nes escueles" y un 2,2 por cientu que "nun sabe/nun contesta".

Esta cuestión ye una de les que se trata na segunda parte de la encuesta, depués d'una primera oxetiva pa concretar la capacidá llingüística n'asturianu al traviés d'un cuestionariu llingüísticu. Les restantes son les siguientes:

• Alfabetización I: el 37 por cientu diz qu'entiende y fala l'asturianu; el 29 namái lu entiende; el 16,4 entiende, fala y llee; el 13,2 entiende, fala, llee y escribe; y el 4,4 nin lu fala nin lu entiende. En total, el 66,6 por cientu declárase falante d'asturianu.
• Alfabetización II: el 80 por cientu nunca tuvo escolarizáu n'asturianu, el 13,8 diolu na escuela y el 4,4 n'otru tipu de cursos, mentes qu'en un 1 por cientu nun sabe/nun contesta.
• Reproducción interxeneracional: a un 63,2 por cientu prestaría-y ver que los sos fíos dominen l'asturianu, por un 18,4 al que nun-y gustaría, un 14,4 que respuende "depende" y un 4 por cientu que nun sabe/nun contesta.
• Politización del asturianu: un 89,4 por cientu considera que "l'asturianu forma parte del patrimoniu cultural d'Asturies y debería tar al marxe d'ideoloxíes polítiques concretes", por un 6,2 que cree que "l'asturianu deféndese meyor cuando la defensa tien un calter políticu" y un 4,4 que nun sabe/nun contesta.
• Tratu institucional: más del 70 por cientu demanda un tratu institucional igual o meyor que'l que reciben el restu de llingües del Estáu.
• Futuru llingüísticu d'Asturies: el 95,8 por cientu quier un futuru billingüe p'Asturies (un 69,4 de manera voluntaria y un 26 de manera más intensiva).

Na semeya, Xosé Antón González Riaño, presidente de l'Academia de la Llingua Asturiana, y Llera Ramo na presentación del avance de resultaos del estudiu.