Un estudiu de l’ALLA ruempe cola 'creyencia' de que’l conocimientu del asturianu ta arrequexáu a contestos rurales

Esti martes l’Academia de la Llingua Asturiana (ALLA) presenta l’estudiu ‘Conocimientu del asturianu nos ámbitos urbanos: Uviéu, Xixón y Avilés’. La institución avanza que los resultaos d’esta investigación “complexa ya inédita” dirixida por Francisco José Llera Ramo ruempen cola creyencia, “enxamás demostrada, de que’l conocimientu del asturianu taba arrequexáu nos contestos más rurales y aisllaos d’Asturies”.

El caderalgu de Ciencia Política y de l'Alministración de la Euskal Herriko Unibertsitatea (UPV-EHU) y académicu, responsable de tolos estudios sociollingüísticos sobre l’asturianu y el gallego-asturiano encargaos pol Gobiernu, nel casu del primeru nel 1991, y pola ALLA, los restantes, tamién s’ocupó d’esti trabayu que toma como referencia’l conocimientu real del asturianu na población urbano de les 3 ciudaes más importantes del país. Mañana al meudía va presentar los datos del mesmu nun actu que va tener llugar nel llar social de la institución, nel que tamién va participar el so presidente Xosé Antón González Riaño.

“Trátase d’una investigación complexa ya inédita, darréu que, más allá de la opinión de la xente, ta centrada nel análisis del nivel d’habilidá llingüística de la población adulto nos noyos urbanos más importantes d’Asturies”, espliquen, al tiempu qu’avancen que los resultaos ruempen “cola creyencia, enxamás demostrada, de que’l conocimientu del asturianu taba arrequexáu nos contestos más rurales y aisllaos d’Asturies”. La importancia de ‘Conocimientos del asturianu nos ámbitos urbanos: Uviéu, Xixón y Avilés’ ta en que dexa evidencies a tener en cuenta “a la hora de plantegar una política llingüística rigurosa, realista y axustada a la real situación sociollingüística de la nuesa comunidá”.

Na semeya, Llera Ramo na presentación del avance de resultaos de la 'III Encuesta Sociollingüísta del Navia-Eo' nel 2021.