El 22,6 por cientu de los ciudadanos tien una capacidá llingüística n'asturianu alta y un 26,8 por cientu, aceptable

Son los datos oxetivos que dexa l'estudiu ‘Conocimientu del asturianu nos ámbitos urbanos: Uviéu, Xixón y Avilés’ combinando les respuestes de los 5 indicadores utilizaos.

Francisco José Llera Ramo creó un índiz de 'capacidá llingüística n'asturianu' a partir de los resultaos de les pruebes sobre fenómenos fónicos, fenómenos léxicos d'identificación de conceptos y de significaos, de fenómenos morfolóxicos y de fenómenos sintácticos incluyíes na encuesta utilizada. Asina afitáronse cuatro niveles: altu, aceptable, diglósicu y nulu/deficiente.

"La metá de la población metropolitana mayor de 16 años dívídese en partes cuasi iguales ente los que reflexen un nivel altu (22,6 por cientu) o suficiente (26,8 por cientu) de capacidá llingüística. Mentes que la otra metá dívidese ente los que tienen un compartamientu predominantemente diglósicu, un 31,2 por cientu, y los qu'amuesen un conocimientu nulu, deficiente, del 19,4 por cientu", apuntó l'autor del estudiu.

Figos, fabes y furacu

La primer prueba consistió na muestra de diez semeyes d'oxetos y situaciones pa entruga-yos pola so denominación n'asturianu (fenómenos fónicos d'identificación visual d'oxetos n'asturianu), una llista que camudó a la metá la del 1991 al ser ésta más de calter rural: "al tar nun mediu urbanu el 'xugu' de les vaques sería difícilmente interpretable", esplicó.  Los cambios concretos foron pescuezu por costiella, fesoria por xugu, panoya por riestra, páxaru por palomba y por xelada por xastre.

"Nel 40 por cientu de los oxetos el nivel d'aciertu supera'l 75 por cientu, polo que ye mui considerable", dixo Llera. Figos, con un 87 por cientu, ye'l más identificáu, siguíu de güeyu (83 por cientu) y fueya d'un árbol (79,2).

Mentes, el pescuezu ye'l que menos, con un 49,4 por cientu, a distancia de páxaru (61,4). En comparanza con va 30 años, el nivel d'aciertu pasa d'un 49 a un 69 por cientu, un avance de más de 20 puntos.

El segundu paquete son los fenómenos léxicos d'identificación de conceptos n'asturianu, una prueba na que se dio a los encuestaos información sobre 17 oxetos o situaciones y se-yos entrugó pola denominación n'asturianu. "Nel 60 por cientu de los casos el nivel d'aciertu torna a superar el 75 por cientu", resume, con fabes como la de mayor nivel d'aciertu (98,2), siguida de fame (95,4 por cientu) y fía (95,2), y la cerezal (40) y xenru (49,6), los que menos.

El porcentaxe nesta ocasión quedó nun 76 por cientu, pol 62 del 1991. D'ún a otru exerciciu namái hebo dos cambios: coxu por virolu y faba por panoya.

A la inversa (fenómenos léxicos d'identificación asturiana de significaos), entrugóse-yos por doce pallabres asturianes, les mesmes que va 32 años. "Nel 67 por cientu, 8 de les 12, el nivel d'aciertu supera'l 80 por cientu, y namái en dos, que son plasmar y sestaferia, que vien d'un entornu rural" rebáxase "al 45 y al 29 por cientu, respeutivamente", apuntó.

Furacu, con un 97 por cientu, foi'l que los encuestaos identificó meyor, siguío por amagüestu (96,4) y chiscar (94 por cientu). El nivel total d'aciertu foi del 78 por cientu pol 80 de l'anterior ocasión, "una diferencia de dos puntos que pue nun ser identificativa al tar diento del marxe d'error muestral".

Aumentu de 30 puntos en fenómenos morfolóxicos

Nos fenómenos morfolóxicos d'identificación de xiros n'asturianu mostráronse un total de 17 pa que dixeren la so formulación vernácula, con un cambiu únicu: trabayó por comió. "En el 70 por cientu, 12 de los 17, el nivel d'aciertu supera'l 80 por cientu", señaló.

'Ye (malo)', con un 95,6 por cientu foi'l más altu y 'al to, a to (padre)', con un 45,8 por cientu, el más baxu. Nel 91 l'aciertu mediu foi del 50 por cientu, mentes qu'agora quedó nun 81 por cientu, esto ye un avance de 31 puntos con una única modificación.

Por último, en fenómenos sintácticos de diferenciación de rexistros asturianu/castellanu presentáronse 12 llocuciones, les mesmes que nel 1991, pa ver si l'encuestáu yera quien a identificar ónde ta la trampa y cómo dicilo n'asturianu y castellanu. "Nel 46 por cientu el nivel d'aciertu supera'l 70 por cientu, mientes que nel 50 por cientu restante les respuestes concretes asítiense ente'l 25 y el 44 por cientu" dando cuenta d'un significativu impautu diglósicu.

'Los llabores/las kabores', con un 89,2 por cientu, foi'l más identificáu, y 'daquella/entonces, en aquel momento', el que menos con un 25,2 por cientu. El 43 por cientu dio por bones les formulaciones nel 1991, "que yera fallar na respuesta", y anguaño namái'l 23 failo, "lo que quier dicir que'l nivel de meyora son 17 puntos".

Mentes, los que dan col error y amás aporten la respuesta correuta son el 57 por cientu, pol 51 por cientu del 1991. "Amás de la cayida del error hai una ameyoramientu netu d'otros 6 puntos", comentó Llera.

Balance del 91 al 23: d'un 18 a un 20 por cientu d'ameyoramientu

"Hai un claru ameyoramientu en toles dimensiones. Nun hai nenguna qu'empeore y namái una caltiénse estable", la de fenómenos léxicos d'identificación asturiana de significaos, recampló l'autor del estudiu ‘Conocimientu del asturianu nos ámbitos urbanos: Uviéu, Xixón y Avilés’ de l'Academia de la Llingua Asturiana al facer balance de la evolución del 1991 al 2023 no que se refier a la capacidá llingüística de la población. "L'avance mediu del conxuntu podemos asitialu ente'l 18 y el 20 por cientu", confirmó, pa depués recordar que va 22 años túvose en cuenta tola población y equí la que vive nes trés mayores zones urbanes, dexando fuera llugares onde l'asturianu tien una gran vitalidá, como les cuenques.