Esti Día de les Lletres Asturianes cuenta con manifestación en redes

|
Cartelu Oficialidá XDLA XLI Día de les Lletres Asturianes horizontal

A les 19 hores convoca la Xunta pola Defensa de la Llingua Asturiana (XDLA) a participar nuna manifestación pola oficialidá del asturianu y el gallego-asturiano por cuenta del Día de les Lletres Asturianes. Énte la imposibilidá de facelo de manera física, les redes sociales van ser el llugar d’alcuentru y reivindicación.

La situación pola pandemia de COVID-19 obligó a l’Academia de la Llingua Asturiana a treslladar el Día de les Lletres Asturianes al 2 d’ochobre. Les restricciones de movilidá pol estáu d’alarma tampoco permite l’entamu de la manifestación pola oficialidá que fina a les puertes del llugar onde la institución celebra’l so actu académicu, pero la XDLA nun quier perder la oportunidá de calcar nos motivos que lleven a miles d’asturianes y asturianos a salir a la cai tolos años.

“Había que facer referencia a la Selmana de les Lletres y recordar qu’entá nun hai normalidá, porque nun la va haber mientres falten derechos”, espuso Carlos Pulgar, voceru nacional del coleutivu’l llunes pasáu n’Asturies.com. Asina, a les 19 hores, media hora enantes de lo habitual, va principiar la primer manifestación virtual pola oficialidá del asturianu y del gallego-asturiano.

A esa hora va emitise nes cuentes en redes sociales de la XDLA un videu que va servir de pistoletazu pa que la ciudadanía empiece a escribir “frases sobre la oficialidá, la llingua asturiana o la falta d'un marcu llegal afayadizu pal nuestru idioma” xunto cola etiqueta #Oficialidá pa convertila en tendencia. Mientres esta selmana yá foron numberosos los mensaxes colos hashtags #YoTuvi y #SemeyaMani con fotografíes de participaciones de los usuarios en manifestaciones previes pol Día de les Lletres Asturianes pa mover la convocatoria d’esta tarde, asina como vídeos de persones reconocíes con mensaxes al respeuto.

Contador Estadistiques