El PP supera al PSOE n'estimación de votu, según el barómetru del CIS de xunetu

Xuníes Podemos pasaría a ser tercera fuerza perriba de VOX nel mes de la presentación de Sumar, el proyeutu que lidera Yolanda Díaz.

Ye la primer vegada dende les eleiciones de payares del 2019 na que'l PP supera n'estimación de votu nos barómetros del Centru d'Investigaciones Sociolóxiques (CIS) al PSOE. El partíu d'Alberto Núñez Feijóo sigue creciendo dende la so llegada a la presidencia popular y algamaría un 30,1 por cientu d'apoyos según l'avance de datos de xunetu, trés puntos más qu'en xunu, mentes que los socialistes baxaríen d'un 29,2 por cientu a un 28,2.

El descensu mayor protagonízalu VOX, que pasa d'un 16,5 por cientu a un 12 por cientu. Supéralu Xuníes Podemos, que garra un impulsu importante cola apaición de Sumar al aumentar del 9,8 por cientu de xunu al 13,4 por cientu.

Más País-Compromís caltiénse nun 1,9 por cientu y Ciudadanos baxa del 1,9 al 1,7.

Na semeya, Núñez Feijóo nel alderique de política xeneral celebráu nel Congresu la selmana pasada, col presidente y líder socialista Pedro Sánchez al frente.