“El mio Gobiernu va plantegar la reforma y adaptación de la Llei d’Usu”, avanza Barbón

“Mentes seya presidente voi defender les nuestres llingües propies, l’asturianu y l’eonaviegu”, espresó Adrián Barbón nel discursu del Plenu d’Investidura na Xunta Xeneral. Recordó que “el mio compromisu programáticu ye’l reconocimientu de la oficialidá”, pero dada la falta de los 27 votos pa reformar l’Estatutu, anunció que “el mio Gobiernu va plantegar la reforma, actualización y adaptación de la Llei d’Usu”.

L’únicu candidatu a presidir el Gobiernu del país, depués de la decisión del popular Diego Canga de nun presentase tratando d’evitar un apoyu del socialista en Convocatoria por Asturies, intervieno per una hora y venti minutos na primer de les dos sesiones del Plenu d’Investidura, que podríen ser trés si na votación de mañana Barbón nun algama una mayoría absoluta. Nesi casu, necesitaría una mayoría simple na del vienres, que yá tien garantizada colos votos de la coalición conformada por Izquierda Xunida (IX), Más País y Izquierda Asturiana (IAS).

Nunca hasta la fecha emplegara’l socialista tantu tiempu les llingües propies d’Asturies nun discursu na Xunta Xeneral. Fíxolo pa falar del quintu puntu del so programa de gobiernu, entituláu ‘El aprecio á cultura. Arguyo d’identidá’.

Nel mesmu comprometióse a “plantegar la reforma y adaptación de la Llei d’Usu y Promoción del Asturianu”, pa lo que sería necesario una mayoría parllamentaria, esto ye 23 diputaos, que sí se sumen anguaño a favor de la oficialidá. Tamién a “mantener l’apoyu a l’Academia de la Llingua” y a “negociar col ministeriu’l reconocimientu de les correspondientes especialidaes docentes”, asina como “facilitar que’l personal público pueda formase n’asturianu si ye’l so deséu”.

Recordó que “el mio compromisu programáticu ye’l reconocimientu de la oficialidá al traviés de la reforma del Estatutu, y la xustificación ye bien comprensible: evitar la desapaición, la estinción, d’esi patrimoniu cultural tan grande. Ye increíble, penoso, que dalgunes fuercies tengan a gala facer de búnker pa impedir poner al día l’Estatutu y, en concreto, pa bloquiar la oficialidá de les llingües del Principáu. Como ye llamentable, d’un sectarismu inconstitucional, que se promueva’l vetu cultural a quienes canten n’asturianu. Al contrario, el Gobiernu del Principáu va fomentar y garantizar la llibertá plena d’espresión y de creación artística. Ye otra bona manera de contrastar les diferencies”.

Los cambios pa la reforma del Estatutu "tienen que venir de la derecha"

Una reforma del Estatutu que “sigo defendiendo”, incluyendo “una oficialidá consensuada, ensin imposiciones”, pero ye consciente de que “o hai un cambiu de planteamientos o va ser imposible axuntar los 27 votos qu’esixe la reforma del Estatutu. Los cambios tienen que venir de la derecha”, afirmó señalando a la zona del Parllamentu onde se sienten los diputaos populares.

“Invito a la moderación, a que se garre exemplu de comunidaes cercanes, como Galicia. Aznar dixo nel so día que falaba catalán na intimidá. Nunca sabremos si yera verdá, lo que sí tengo claro ye que Feijóo fala gallegu en público y nun-y cuesta trabayu nin se pon coloráu por ello”, siguió.

Aumentu de les partíes pa Deportes

Nesti apartú Barbón tamién fixo referencia al deporte, que, yá en castellanu, apuntó “tamién va merecer una atención preferente esta llexislatura, mui percima de les anteriores”. Asina, anunció un aumentu presupuestariu pa les federaciones, que pasarán de recibir 600.000 euros a 900.000, y pa los clubes, agora en 450.000 euros, hasta’l millón.

Tamién aseguró que va actuar en ‘Fuentes de Invierno’ pa desestacionalizar l’usu de la estación de monte, incluyíu’l branu, y potenciar Valgrande-Payares. “Amás, vamos continuar fomentando la inclusión y la igualdá. Nesti momentu nun hai aficionáu que nun reconoza’l protagonismu creciente y l’éstiu de les muyeres en tolos deportes. Ésti ye’l rumbu que va guiar el mio gobiernu”, finó esti bloque del discursu.