El prealcuerdu de gobiernu inclúi una reforma de la Llei d’Usu y un Plan de Normalización

La FSA-PSOE y Convocatoria por Asturies zarraron esti vienres un prealcuerdu de gobiernu pol que la coalición va xestionar la Conseyería d’Ordenación del Territoriu, Urbanismu, Vivienda y Derechos Ciudadanos. Nel documentu reafirmen el so compromisu cola reforma del Estatutu pa reconocer la oficialidá, y mientres nun haya mayoría, van impulsar la reforma de la Llei d’Usu y un Plan de Normalización Llingüística.

A falta de l’aprobación por parte de les bases de los dos partíos, a los que se va consultar nel entamu de la selmana viniente, va haber un Gobiernu “d’unidá progresista” nesta llexislatura. Ye como se refirió al mesmu’l presidente Adrián Barbón nel Plenu d’Investidura y como s’entitula’l documentu que recueye tolos puntos d’alcuerdu ente los socialistes y la plataforma conformada por Izquierda Xunida (IX), Más País y Izquierda Asturiana (IAS).

Son 14 páxines nes que se citen l’impulsu demográficu, la concertación social, el compromisu feminista, l’impulsu de la Llei de Ciencia, el Pautu pola Salú Mental, l’aplicación de la Llei de Vivienda o un plan estratéxicu de calidá del aire, ente otros. Tamién inclúí ún apartáu nel que “reafirmamos el nuesu compromisu pa cola cultura asturiana y llingua asturiana y, en particular, cola reforma del Estatutu d’Autonomía pa reconocer la oficialidá del asturianu y eonaviego”.

Esi mesmu puntu amplíase cola anuncia de que “impulsaremos l’adaptación y reforma de la Llei d’Usu y Promoción del Asturianu mientres nun sía posible articular la mayoría reforciada pa la reforma estatutaria, asina como un plan de normalización llingüística que garantice la tresversalidá”.

Una viceconseyería asociada

Convocatoria por Asturies va xestionar una conseyería d’importancia como ye la d’Ordenación del Territoriu, Urbanismu, Vivienda y Derechos Ciudadanos. Amás va llevar una viceconseyería asociada.

Na semeya, Ovidio Zapico, voceru de Convocatoria por Asturies, diríxese a Barbón nen Plenu d'Investidura.