Barbón defende n’asturianu “un modelu propiu d’oficialidá” nel discursu del Plenu d’Investidura

|
Adrián Barbón discursu Plenu d'Investidura

L’únicu candidatu a la presidencia d’Asturies, el socialista Adrián Barbón, emplegó l’asturianu na parte dedicada a les llingües del país nel discursu del Plenu d’Investidura. “La meyor manera d’evitar la desapaición del asturianu ye afitando un modelu propiu d’oficialidá basáu na proteición y el consensu”, defendió.

Foi al final del discursu, de casi una hora de llargor, cuando Barbón comenzó’l col bloque cultural de la intervención qu’abrió la primer sesión del Plenu d’Investidura, que va siguir mañana col turnu de los voceros de la oposición, con derechu a réplica, y cola primer votación, na que necesita una mayoría absoluta qu’anguaño nun tien. Y fíxolo tocando la cuestión llingüística, pa lo qu’emplegó l’asturianu, nun xestu nunca visto nesti contestu por parte d’un futuru presidente del país.

“L’asturianu y l’eonaviego son dos llingües propies, son un patrimoniu, una riqueza cultural. Entrúgome cómo pue haber dalgún partíu políticu que nun-y importe que muerra. Ye una actitú que me paez un sinsentíu. Nun entiendo la zuna cola que la derecha reacciona cada vegada que se fala d’asegurar la supervivencia de la llingua asturiana, de protexela o de facilitar el so usu y aprendizaxe. Ye un casu de fobia autóctona, un ‘endemismu’, porque nun conozo nenguna otra comunidá onde la derecha refugue la so llingua”, comenzó, pa depués poner d’exemplu Galicia.

Darréu confirmó que “el mio Gobiernu va trabayar pa evitar la desapaición del asturianu. La meyor manera de facelo ye afitando un modelu propiu d’oficialidá basáu na proteición y el consensu”, calcando nesto último, polo que convidó –cambiando agora al castellanu– “a les fuercies de la derecha” a que “abandonen el so encasillamientu, qu’acepten una negociación abierta sobre la reforma de nuestra norma básica y que s’abran a la posibilidá d’alcordar un modelu d’oficialidá cimentáu nestes premises”.

Pa ello, ufrió “diálogu francu sobre l’Estatatu que, ente otres cuestiones, nos permita asegurar la sobrevivencia d’ún de los nuesos patrimonios culturales más valiosos. Nun-yos pido nin-yos ofrezo nada distinto a lo que fixeren otres comunidaes, ente elles les que gobiernen”.

Cinco cuestiones clave y cinco compromisos inmediatos

Nel restu del so discursu, Barbón propunxo a tola oposición, a esceición del ultraderechista VOX, dir de la mano en cinco puntos clave: la creación d’emplegu de calidá, el desarrollu d’una industria competitiva, el refuerciu de los servicios públicos, la igualdá de xéneru y el retu demográficu. Tamién fixó como prioridá algamar un arancel medioambiental na Xunión Europea pa defender la producción asturiana frente a la competencia deslleal d’otros países, dientro de cinco compromisos inmediatos, ente los que ta'l so sofitu al municipalismu, apuntando que la so primer visita institucional va ser a Yernes y Tameza, el conceyu con menos población del país; l'entamu d'un alcuentro cola patronal; la tresmisión al presidente del Gobiernu estatal, Pedro Sánchez, de les sos esmoliciones sobre la transición enerxética y les comunicaciones; y la esploración de grandes consensos cola oposición.

 D’igual forma solicitó a Asturies pela Izquierda, col que tien un alcuerdu, y a Podemos collaboración pa llevar alantre polítiques “progresistes y d’izquierda”. La sesión, que contó cola presencia del presidente Javier Fernández y de tol Gobiernu en funciones, va siguir mañana, cola posibilidá que s’allargue hasta’l llunes nel casu de que Barbón nun salga escoyíu na primer votación.

Contador Estadistiques