SUATEA demanda la equiparación curricular de les llingües d’Asturies col castellanu y l’inglés na aplicación de la Llei Celaá

La entrada'l cursu viniente de la LOMLOE, conocida como Llei Celaá, permite un cambiu na presencia del asturianu y el gallego-asturiano nel sistema educativu. SUATEA demanda a la conseyería, na so aplicación, la equiparación curricular de les llingües d’Asturies col castellanu y l’inglés, y el cumplimientu de la Llei d’Usu.

Coles modificaciones establecíes na norma nueva recupérase la distribución de competencies ente l'Estáu y les comunidaes autónomes no relativo a los conteníos básicos de les enseñances mínimes, que van riquir el 50 por cientu de los horarios escolares nos llugares que tenga llingua cooficial y el 60 por cientu p'aquelles que nun la tengan, dexando tamién a los centros establecer un porcentaxe del currículu. “Ábrese d'esta forma la posibilidá de reestructurar bona parte del currículu y aumentar la carga horaria y el pesu curricular de les nuestres llingües”, asegura’l Sindicatu Unitariu Autónomu de Trabayadores de la Enseñanza d’Asturies (SUATEA).

Entendiendo que la solución definitiva pal enseñu de la materia de Llingua Asturiana y de Gallego-asturiano “pasa por declarar la oficialidá”, nel marcu nuevu qu’ufre la Llei Orgánica de Modificación de la LOE (LOMLOE) “la nuestra Conseyería Educación tienen el deber d'aprovechar esti aumentu nes sos competencies y la reestructuración del currículu impuestos pola nueva llei, p'allegamos lo máximo posible a la situación d'oficialidá”. Asina, el sindicatu reclama la equiparación curricular de les llingües d’Asturies col castellanu y "la primer llingua estranxera", y el cumplimientu de la Llei d’Usu y Promoción del Bable/Asturianu, qu’obliga a que la materia pase a ser voluntaria en toles etapes.

Tamién insiste na tan demandada creación de la especialidá docente, la inclusión de les llingües propies nel plantíes orgániques de los centros y nes necesidaes educatives eliminando les medies xornaes y el reconocimientu del “fraude de llei cometíu col personal interino qu'imparte estes especialidaes en puestos estructurales y indemnizalo cola fixeza nel puestu trabayu nes mesmes condiciones que'l restu de profesoráu interino en situación de fraude”.

Na semeya, la conseyera d'Educación, Carmen Suárez, esta mañana nun aconceyamientu telemáticu col alcalde d'A Veiga, César Álvarez.