“Cola ‘Llei Celaá’ la conseyería tien la oportunidá de reorganizar les enseñances pa dar meyor cabida al asturianu”, diz CC OO

El martes el Conseyu de Ministros aprobó’l proyeutu de Llei Orgánica de Modificación de la LOE (LOMLOE), la conocida como ‘Llei Celaá’. La posición de la materia de Llingua Asturiana nun cambiará con esta norma, cola que la conseyería sí va tener “la oportunidá de reorganizar les enseñances pa dar meyor cabida al asturianu en Secundaria y Bachilleratu”, apunta CC OO Enseñanza.

La LOMLOE, qu’enantes tien que pasar pel Congresu, aporta pa derogar la Llei Orgánica pa la Meyora de la Calidá Educativa (LOMCE) aprobada baxo mandatu del popular José Ignacio Wert nel 2013. Con esta norma la Llingua Asturiana y el Gallego-asturiano quedaron encuadraos nel bloque d'asignatures de llibre configuración autónomica al tener en cuenta les llingües non oficiales con reconocimientu xurídicu y presencia na educación, y cola ‘Llei Celaá’ la materia “va caltenese na mesma posición que ta por analoxía a lo que va pasar coles autonomíes con llingua propia”, apunta Marta Mori, secretaria de Llingua Asturiana y Gallego-asturiano del sindicatu.

Asina, la disposición adicional trentena octava ‘Llingua castellana, llingües cooficiales y llingües que gocien de proteición llegal’ afita nel so puntu quintu que “aquelles comunidaes autónomes nes qu’esistan llingües cooficiales que nun tienen esi calter en tol so territoriu o llingües non oficiales que gocien de proteición llegal podrán ofreceles nos términos que determine la so normativa reguladora”. El cambiu que pue aportar la ‘Llei Celaá’, mentes, ta nes posibilidaes que da a la Conseyería d’Educación pa la reorganización de les enseñances, dalgo más que necesario en Secundaria y Bachilleratu, según señalen dende CC OO.

“Queda en manes de la conseyería la inserción de l’asignatura en Bachilleratu”, asegura Mori, que recuerda que la organización actual dexa fuera la Llingua Asturiana ente los qu’escueyan l’Artísticu y el Teunolóxicu. “Ye materialmente imposible porque tienen 7 hores pa optatives y les que necesiten los d’estes dos modalidaes son de 3 y 4”, esplica, polo que namái los d’Humanidaes tienen accesu real al asturianu.

CC OO Enseñanza tamién demanda que cola reordenación nueva se recuperen les cuatro hores nesta etapa educativa. Anguaño, los alumnos qu’escueyen la materia en Bachilleratu reciben una hora selmanal.

Asignatura espeyu

Nel casu de Secundaria, el sindicatu reclama la creación d’una asignatura espeyu a la Llingua Asturiana “pa que los alumnos pueda escoyer sí o non al asturianu y nun tener que perder una optativa interesante, como una segunda llingua estranxera o Informática, pa cursala”. Esto ye, lo qu’asocede agora en Primaria, nel que los escolinos elixen Llingua Asturiana o Cultura Asturiana.

D’esta forma cumpliríase cola Llei d’Usu y Promoción del Bable/Asturianu. Nel so artículu 9 afita que “el Principáu d’Asturies, nel exerciciu de les sos competencies, asegurará la enseñanza del bable/asturianu y promoverá’l so usu dientro del sistema educativu, nos términos previstos nel Estatutu d’Autonomía d’Asturies”, espicificando nel 10 que “garantizará la enseñanza del bable/asturianu en tolos niveles y graos, respetando sicasí la voluntariedá del so aprendizaxe”, dalgo qu’agora nun se da.

Presentación d'enmiendes a la norma

Sobre la propia llei nueva, que va necesitar el sofitu de los partíos nacionalistes pa ser aprobada, CC OO Enseñanza llamenta “que una vegada más nun se tuviera en cuenta a los profesores pa la so ellaboración”. Asina, considera “manifiestamente meyorable” un proyeutu de llei “que de presentase nos años 90 consideraríase por tolos actores implicaos como una llei de dereches”.

Ente les crítiques a la norma ta que “sigue considerando a la rede pública como subsidiaria de la concertada, y nun corrixe les polítiques de ‘diferenciación y autonomía de los centros’ que son la base de les polítiques neolliberales na educación, al permitir que s’ufierten ‘distintos productos escolares’ concibiendo a les families como consumidores qu’escueyen unos o otros productos”. Tamíén consolida “el ‘modelu profesionalizáu’ de lideralgu nos centros”, apunten.

CC OO, que va presentar enmiendes a la LOMLOE, esixe al Gobiernu estatal “una normativa qu’asitie a la escuela pública como exa vertebradora del sistema educativu, que cuente con una llei de financiación que la complemente, qu’incluya nel currículu conteníos educativos que dean respuesta a les problemátiques actuales a nivel social y qu’acabe cola temporalidá nel emplegu y cola precariedá de miles de docentes de la escuela pública”.

Na imaxe, la ministra d'Educación y Formación Profesional, Isabel Celaá, na rueda de prensa posterior al Conseyu de Ministros. Semeya obra de Pool Moncloa/Borja Puig de la Bellacasa.