Casu grave de discriminación llingüística: “Depués de 4 años nun se m’autoriza a usar nin Xicu nin Ilesies”

A Xicu Ilesies l’Alministración niega-y ser Xicu Ilesies. Anque’l xulgáu de Llaviana sí-y autorizara va cuatro años a camudar el so nome rexistráu al nacer, Francisco José, por Xicu, una resolución de la direutora xeneral de Seguridá Xurídica y Fe Pública del Ministeriu de Xusticia anula la mesma y tampoco-y permite adecuar l’apellíu Iglesias a la grafía y ortografía asturiana como solicitaba.

A Francisco José Iglesias Barros tol mundu conozlu como Xicu Ilesies. El so nome de nacencia, “obligáu y demasiao llargu” –“el mio padre y la mio madre queríen llamame Francisco y a la mio hermana Dolores, pero naquella época la moda eclesiástica yera llantanos el José y el María”–, quedaba namái pal DNI.

Na orla, nel buzón de casa, na invitación de la so boda de la que güei cumplíense 40 años…, apaecía esi nome que, colo llegada de la prexubilación y la disposición de tiempu, quixo llegalizar. “Pa ello fui al Rexistru Civil de Llangréu, que ye onde toi inscritu. Ehí nun hebo problema nengún, comentáronme los requisitos que se pidíen, cumplíalos toos, y sólo hebo una cuestión, que me pidieron el certificáu d’empadronamientu”, empecipió a rellatar.

Entamen los problemes

Al tar empadronáu en Sobrescobiu, “en contra de lo que diz la norma, supongo que foi un error de la funcionaria nesi momentu, remíteseme al xuez de paz de Sobrescobiu”. Y entamaron los problemes: “Inicié’l procedimientu pa presentalo nel Xulgáu de Paz y ehí cambien toles normes, empezó la cosa a desmadrase, y yá nun ye lo que dicía la normativa”.

“Pa empezar faime una entrevista la xueza de paz y el secretariu nel que se me somete a una presión que nun vos podéis imaxinar, una presión que partía de los prexuicios llingüísticos del secretariu en cuestión, como plantegar temes como “bonu, nun ta claro que l’asturianu sía una llingua o un dialeutu”. Amenazóme con tolos males del mundu: diba perder les propiedaes…, la del demoniu”, recuerda.

“Gracies a que llevo más de 40 años de militancia, d’activismu pola llingua, salí d’ellí cola solicitú presentada. Cualquier persona normal tuviera como poco mieu y lo más seguro ye que nun saliera presentando la solicitú”, sigue.

Magar que la normativa nun lo indica “per nengún llau”, otra cosa que-y planteguen “ye que tengo que presentar testigos”. “Nun tuvi inconveniente nengún y presenté dos testigos y non dos testigos cualquiera, porque diose la casualidá qu’una yera la vicealcaldesa de Sobrescobiu, Tensi Carmona, y otru l’alcalde pedaneu de Campiellos, l’aldea na que vivo”, esplicó.

Pero esta cuestión foi lo de menos. “El xuez de paz remite l’espediente a la xueza de Llaviana y ésta pide opinión al fiscal. El fiscal autoriza’l cambiu de nome, Francisco por Xicu, pero refuga’l cambiu d’apellíu con un criteriu que ye poco menos que surrealista porque diz que nun queda suficientemente acreitada la utilización, cuando tolos documentos que presenté inclúin Xicu y Ilesies. Y diz que tampoco ta acreitáu qu’esista a un apellíu asturianu que sía Ilesies”, apuntó al tiempu que recordó que presentara un documentu de l’Academia de la Llingua Asturiana nel que garantizaba que Xicu Ilesies yeren los equivalentes n’asturianu a Francisco y Iglesias, asina como’l DNI de Ramsés Ilesies Fernández “que lleva 20 años él, el so padre y la so hermana col apellíu Ilesies en Rexistru”.

L’informe del fiscal lleva a la xueza a refugar el cambiu d’apellíu. “Lo que me queda a partir d’ehí ye presentar un recursu”, énte la Subdireición Xeneral del Notariáu y de los Rexistros del Ministeriu de Xusticia, presento l’escritu y vuelve a contestar el señor fiscal que, nesti casu, yá se dirixe a min como Xicu Iglesias Barros, diciendo que “el recurrente simplemente trata de sustituir el convencimiento del juez por el suyo propio”. Ye tola argumentación que dio al respeuto”.

Contestación cuatro años depués

“El recursu sigue’l trámite, y cuasi 4 años depués, contéstenme. Y contesta la direutora xeneral de Seguridá Xurídica y diz, ensin citar la correspondiente llei na que se basa, que “no se acredita suficientemente el uso del nombre con las escasas pruebas aportadas –aporté hasta la foto de la orla– , todas de la misma naturaleza y cercanas a la fecha de solicitud –el 87 nun ta mui cerca del 2019...– y aún las creadas por el propio interesado –eso entovía nun llegué a entender qué quier dicir–” y deniegame l’usu de Xicu, que yá tenía aprobáu n’Asturies. Y diz, eso sí, que “si en el futuro llegase a contar con pruebas más sólidas que permitan apreciar un uso constatado nel tiempo del nombre propuesto podría instar nuevamente el cambio””, cuenta Ilesies.

Y sigue rellatando: “Eso en cuanto al nome; en cuanto al apellíu –nun cita en qué se basa esta argumentación– diz que “sólo es posible realizar la corrección gramatical de los apellidos propios de una lengua española que consten correctamente inscritos de acuedo con las directrices ortográficas de dicha lengua, pero no pueden realizarse por dicha vía ni la traducción de un apellido –yo nun toi pidiendo traducción nenguna, toi pidiendo l’adecuación fonética y gramátical, que ye lo que se fai nestos casos n’Asturies, en Cataluña, n’Euskadi, en Galicia…, en toles comunidaes que tienen una llingua propia– y l'adaptación gráfica a otra de las lenguas oficiales de apellidos –que ye onde vien yá’l prexuiciu ideolóxicu– que sean del acervo nacional –nun sé si me tán escluyendo del ‘acervo nacional’ a min y a los asturianos, nun debemos formar parte d’esi ‘acervo nacional’– como es el caso de Iglesias, que es evidente que no puede ser calificado específicamente d’orixe asturianu”, dalgo que nun sé d’ónde lo sacaron”.

“La conclusión ye que depués de 4 años nun se m’autoriza a usar nin Xicu nin Ilesies”, denuncia’l ciudadanu, que fixo esta denuncia pública na sala de prensa de la Xunta Xeneral en compañía de Rafael Palacios, voceru parllamentariu de Podemos. “Quédame namái un recursu que ye presentar una oposición a esti recursu. Evidentemente nun soi optimista n’absolutu, toi seguru de que lu van rechazar tamién depués de tol percorríu que lleva. La única cosa que me queda ye denuncialo públicamente y facer un llamáu a les instituciones que tán concerníes pa que nun pasen del asuntu”, reclamó.

Apoyu xurídicu de Podemos

Asina va presentalu énte’l Xulgáu de Primera Instancia de Llaviana, pa lo que van contar col sofitu de los servicios xurídicos de Podemos. “Paeznos un casu grave, intolerable y llamentable de discriminación llingüística, qu’amás significa un retrocesu, porque ta negándose a Xicu Ilesies adecuar el nome cuando hai persones n’Asturies que se llamen Xicu y que s’apelliden Ilesies”, rescampló Palacios.

El de Ciañu calificó la situación que vive Ilesies como un “ataque frontal y directu a los derechos llingüísticos de les asturianes y de los asturianos, ataques que n’otres partes del Estáu español nun sufren”. “Esto nun ye un casu de discriminación a Xicu. Equí lo que s’abre ye una puerta peligrosísima a que la discrecionalidá total y absoluta del funcionariu de turnu impida que les persones puedan exercer los sos derechos”, siguió al tiempu que recordó que “esto pasa, una vez más, al nun ser oficiales les llingües propies d’Asturies”.

Na imaxe, Ilesies y Palacios. Semeya obra d'Iván G. Fernández.