L’ALLA denuncia “l’estáu d’inseguranza xurídica” que los asturianofalantes viven “nel exerciciu de los derechos llingüísticos”

|
Xicu Ilesies

Les torgues a Xicu Ilesies pa rexistrar llegalmente’l so nome coles formes asturianes llevó a l’Academia de la Llingua Asturiana (ALLA) a posicionase al respeuto y comunicar el so sofitu a esti ciudadanu énte “esti agraviu”. “El so casu refiértanos, llamentablemente, l’estáu d’inseguranza xurídica que la población asturianofalante vive nel exerciciu de los derechos llingüísticos”, denuncia.

“L’ALLA quier espresar públicamente la so esmolición poles torgues qu’un vecín de La Felguera, Xicu Ilesies, ta topando pa rexistrar formalmente’l nome y los apellíos nes sos formes asturianes, conforme a la previsión llegal. Esti procedimientu, cenciellu y normalizáu, nun alcuentra davezu problema nengún nel so desendolcu, qu’entama col certificáu d’equivalencia de l’ALLA y remata cola actualización de los datos nel Rexistru Civil y nel DNI”, apunten dende la institución.

Entienden que “la situación particular del asturianu na llegalidá vixente fai que, dacuando, los intereses llexítimos de la población choquen cola voluntá, la disponibilidá o l’enclín ideolóxicu del funcionariáu. Esto supón una circunstancia que reduz les llibertaes llingüístiques y france los principios d’igualdá que rixen nuna sociedá democrática”.

“Única ferramienta precisa: oficialidá”

Una vegada conocida la situación vivida por Ilesies, l’ALLA anima a “toles persones que s’atopen en situaciones asemeyaes busquen la so proteición en materia de derechos llingüísticos”, amás de calcar nel so sofitu a esti vecín de La Felguera, y desixe “a la instancia competente qu’actúe ensin pilancos y conforme a les normes que regulen el procedimientu d’adautación al asturianu del nome y los apellíos, y a les instituciones que tean al cuidu d’esta, que vixilen la so actuación”. Por último, denuncia “espresamente los problemes que xenera la falta d’homologación llegal del asturianu y pidir a tol espectru políticu que trabaye na reconocencia total de los derechos llingüísticos al traviés de la única ferramienta precisa: la oficialidá”.

Na imaxe, Ilesies. Semeya (recortada) obra d'Iván G. Fernández.

Contador Estadistiques