Iniciativa sofita a Xicu Ilesies y recuerda los pasos a dar p'adecuar el nome al asturianu

Reclama "una mayor sensibilidá llingüística a les persones que xestionen esti tipu de solitúes".

Iniciativa pol Asturianu solidarízase col vecín de La Felguera qu’ayeri denunció un casu de discriminación llingüística. A Xicu Ilesies torgaron-y el derechu d'adecuar de manera oficial el so nome y apellíu al asturianu, un casu del que, afirmen, esti coleutivu ye conocedor dende va tiempu.

"Dempués de tantos pilancos y tantos años de normalización del idioma, resulta increíble les trabes coles que s’alcuentra una persona pa poder poner el so nome (Xicu) y apellíu (Ilesies) n’asturianu", llamenten dende'l coleutivu, que va trés años grabó'l documental ‘La vida ensin oficialidá: Les consecuencies de la falta de drechos llingüísticos n'Asturies’ con dellos testimonios de ciudadanos sobre problemes vivíos al querer usar llibremente l'asturianu al que se podía sumar agora'l d'Ilesies. "Amás d’espresar públicamente’l sofitu al afectáu, la organización quier reclamar una mayor sensibilidá llingüística a les persones que xestionen esti tipu de solicitúes que s’alcuentren amparaes pola Llei de Rexistru Civil nos sos artículos 52, 53 y 54 relativos a los cambeos de nome", comuniquen.

El procesu

Les persones que quieran siguir los pasos de los munchos asturianos que quixeron afayar los sos nomes al asturianu lo primero qu'han facer, recuerda Iniciativa pol Asturianu, ye solicitar un certificáu a l’Academia de la Llingua Asturiana. Llueu ye necesario facese con un certificáu d’empadronamientu del conceyu y pidir una copia del de nacencia nel Rexistru Civil.

"El pasu final, enantes de solicitar el cambiu del DNI, ye dir al Rexistru Civil correspondiente colos trés certificaos, la instancia y una fotocopia del DNI. El trámite ‘Adaptación del nome al idioma de la CA’ ye inmediatu y nun tien costu nengún", rescamplen.

Na imaxe, Ilesias y Rafael Palacios, voceru parllamentariu de Podemos, ayeri na sala de prensa de la Xunta Xeneral na intervención na que denunciaron públicamente esti casu de discriminación llingüística. Semeya obra d'Iván G. Fernández.