Barbón esplica que’l cambiu con Cultura y Política Llingüística llega “depués de recoyer problemes estos meses y escuchar a la sociedá”

“Aproveché esti momentu”, espresó a la prensa Adrián Barbón en Presidencia en referencia a la salida de Melania Álvarez García hacia’l Senáu. Cultura y Política Llingüística tornen a tener rangu de conseyería cola viceconseyera Ana Vanessa Gutiérrez al frente, que sigue cola competencia de Deporte y incorpora Derechos Sociales.

“Cuando definí la estructura quería da-y importancia a Cultura faciendo que dependiera direutamente del presidente del Principáu”, esplicó’l socialista, que s’atopó “con cuestiones como qu’en dalgunes fundaciones s’impidió participar a la viceconseyera de Cultura por nun tener rangu de conseyera. Nes conferencies sectoriales taba yá cuestionándose, próximamente va haber amás una importante, si na Conferencia Sectorial de Cultura podía o non participar la viceconseyera por nun tener rangu de conseyera. Poro, aproveché esti momentu depués de recoyer per meses los problemes que taba habiendo y escuchar activamente a la sociedá”.

Un cambiu, l’aumentu de rangu de Cultura y Política Llinguística que, aseguró, “me consta que l’asturianismu cultural y políticu entendiólu perfeutamente”, asina como’l sector cultural, al ser entrugáu sobre la posiblidá d’axuntar estes competencies con Educación en llugar de con Derechos Sociales y Bienestar. Tamién cuestionáu pola dimensión de la conseyería nueva (Derechos Sociales, Cultura, Política Llingüística y Turismu), argumentó que’l fechu de separtar Vivienda (Reordenación del Territoriu) y Discapacidá (Salú) de la d’Álvarez García nel momentu de la conformación del Gobiernu xunto con Convocatoria por Asturies debióse al repartu competencial cola coalición y non a un escesu de trabayu y rescampló que’l presupuestu que movería la nueva con Cultura ye menor que con Vivienda na llexislatura anterior.

Sobre Gutiérrez, afirmó que “naide dulda del so perfil. La so capacidá y rigor inteleutual, la so inmensa capacidá de trabayu y d’empatizar colos demás, de ponese nel llugar de los otros… Si a ello-y sumamos la mano izquierda que tien pa trabayar y la mano derecha, al empar, pa dialogar… Va ser una grandísima conseyera, como foi una escelente viceconseyera, reconocío polos diferentes sectores. Toi seguru d’ello”.

Viceconseyería de Derechos Sociales y Bienestar

Barbón apuntó tamién la creación d’una viceconseyería de Derechos Sociales y Bienestar “pa refozar la parte social del gobiernu de la conseyería nueva. Asina que la Cultura adquier rangu de conseyería, que ye una de les reivindicaciones constantes que se nos facía, y l’área del Derechos Sociales y Bienestar va ser reforzáu más porque va tener el perfil d’una viceconseyería pa dota-y de tol conteníu y afrontar los retos que vienen per delantre”. Sicasí, nun adelantó’l nome de la persona que va ocupar esi cargu.