Barbón acepta la esixencia de los trés quintos de Pumares pa la llei que desendolque la oficialidá

“El grupu socialista, el Partíu Socialista y el Gobiernu d’Asturies acéptalo porque cree que ye positivo de cara a buscar el máximu consensu de desendolcu d’esa norma”. Adrián Barbón confirmó esta mañana nel turnu d’entrugues al presidente l’aceptación de la esixencia de los trés quintos puesta pol diputáu de Foro Adrián Pumares.

“Con una aprobación ultrareforciada d’esa llei, dende llueu hai que buscar consensos”, siguió’l socialista, que tornó a defender la so propuesta de ‘oficialidá amable’ ente la insistencia del voceru de VOX, Ignacio Blanco, cola obligatoriedá na so intervención pa presentar la entruga “¿Pue detallar güei de manera clara y concisa a tolos asturianos el modelu d’oficialidá ‘amable’ que quier vusté imponer n’Asturies”?, na mesma llinia a la fecha’l día anterior a la conseyera de Cultura, Política Llingüística y Turismu, Berta Piñán. Yera la primera de les trés preguntes previstes na sesión de güei nel Plenu de la Xunta Xeneral sobre esti tema y la reforma estatutaria, les dos restantes obra de Ciudadanos y Asturies pela Izquierda (IX-IAS).

Los trés quintos p’aprobar la llei de normalización que desendolque la oficialidá na llexislatura próxima que pon Foro como condición pa sofitar la reforma estatutaria atopa la oposición de la Xunta pola Defensa de la Llingua Asturiana (XDLA), qu’entiende que va imposibilitar l’aprobación de futures normes “qu’aseguren el futuru de la identidá llingüística d’Asturies” al poder ser torgaes por “una minoría de 19 votos de los 45”. Mentanto, dende sectores cercanos a la formación política defenden la esixencia aceptada de momento por IX y la FSA-PSOE al entender que, una vegada aprobada, va sirvir pa bloquiar dicha llei pa un futuru nel casu de que se dieran mayoríes de dereches contraries a la oficialidá.