Foro condiciona’l so apoyu a la oficialidá a ser imprescindible pa desendolcala

|
Carmen Moriyón en RTPA

Carmen Moriyón, presidenta de Foro, insistió esti martes na esixencia de los trés quintos de la Xunta Xeneral p’aprobar la Llei de Normalización posterior pa dar el so apoyu a la oficialidá y en venceyar la negociación de la reforma del Estatutu cola presupuestaria. “Nun me val ser imprescindible agora y llueu cuando se desendolque lo importante, que ye la llei, nun sía necesario esi consensu”, aseguró.

La ex alcaldesa de Xixón fixo estes declaraciones esta mañana en ‘TPA Noticias Matinal’, onde confirmó la so voluntá de negociar, anque amosándose firme nestes esixencies. “Una condición inamovible ye que l’Estatutu d’Autonomía contemple na so reforma que la posterior Llei d’Usu de la oficialidá requiera pa la so aprobación trés quintos, igual que l’Estatutu, porque güei con 21 diputaos sería suficiente”, apuntando darréu qu’esa llei “ye onde les persones tienen la preocupación”, col exemplu tan emplegáu polos contrarios a la oficialidá de la supuesta obligación al médicu a falar asturianu o “cómo va ser el tema na Educación”.

“Nun me val que Foro sía imprescindible güei pa dar el botón na reforma del Estatutu”, siguió Moriyón, “y llueu cuando se desendolque lo importante, que ye la llei, onde van dicinos les condiciones na Alministración y nel ámbitu educativu, nun sía necesario esi consensu”. Una condición, la de los trés quintos, que yá aceptaron dos de los otros trés grupos en conversaciones, Asturies pela Izquierda (IX-IAS) y FSA, pero que, al igual que Podemos, reclamaron separtar les negociaciones sobre la reforma estatutaria de la presupuestaria.

“Ye inamovible reformar nel so conxuntu l’Estatutu y les reformes que nós creemos que son lo meyor p’Asturies. El conteníu ye lo que ye negociable”, aseguró la presidenta de Foro, qu’añadió que “ye evidente que los presupuestos van venceyaos, porque toles reformes que proponemos cuesten dinero y, poro, la vía tienen que ser los presupuestos. Nun hai más camín”.

Na semeya, Moriyón a la so llegada a la RTPA.

Contador Estadistiques