“Les trés fuercies de la izquierda tenemos qu’analizar hasta ónde tamos dispuestos a llegar pa qu’haya oficialidá”, alvierte Barbón

Adrián Barbón aseguró na Xunta Xeneral que “los socialistes nun tamos dispuestos a reformar la fiscalidá si nun contamos colos demás”, esto ye, si nun hai consensu. “Cualquier alcuerdu que se tenga que desendolcar pa llograr esi votu tien que llevar la firma de les cuatro organizaciones que sumen 27 votos”, esplicó.

El llavianés amosó la so disposición a negociar les condiciones puestes por Foro, pero alvirtió que “les trés fuercies de la izquierda tenemos qu’analizar hasta ónde tamos dispuestos a llegar pa qu’haya oficialidá”. Foi na entruga fecha por Ángela Vallina, vocera d’IX, “¿qué quier dicir cuando afirma que yá cumplió col so compromisu en rellación cola reforma del Estatutu d’Autonomía d’Asturies?”, la tercera esti día na Xunta Xeneral llueu de la plantegada por VOX y la de Ciudadanos sobre si “cree que la cooficialidá ameyorará la competitividá y reactivación d’Asturies”, na que'l socialista punxo d’exemplu la bona situación económica de les comunidaes billingües pa valtar la posición del partíu naranxa.

Eso sí, la negociación de la fiscalidá venceyada a la oficialidá siempre va dir separtada de la presupuestaria. “Les trés fuercies de la izquierda, cuando falemos direutamente col señor Pumares, tendremos que decidir si tamos dispuestos a aceptar eses condiciones o non. Y d’eso depende la oficialidá” porque “nun sumamos 27”, apuntara previamente Barbón, que recordó que “sí pue haber una reforma fiscal posterior a los Presupuestos” poniendo d’exemplu l’aprobación, cuando Dolores Carcedo yera conseyera de Facienda, d’una reforma del impuestu de socesiones: “como nun se pudo incorporar al Presupuestu, foi aprobada posteriormente una reforma de la llei”, rellató.

Na semeya, Barbón y el grupu parllamentariu socialista esta mañana na Xunta Xeneral. Semeya obra d'Armando Álvarez.