Asturies rexistra 167 contaxos diarios de media na selmana última

|
Vacunación personal sanitariu

Sigue l'aumentu de casos nuevos mentes entama la vacunación énte'l personal sanitariu una vez fináu'l trabayu colos internos en residencies y los sos cuidadores.

Na selmana última aumentó la cifra de contaxos diarios, con una media de 167, cuando na anterior, primera vegada na que se frayaba la tendencia de descensu, esta cantidá yera 101. Un total de 1.166 persones garraron COVID-19, tres pasar de 27.558 casos detectaos a los 28.724 actuales –los datos oficiales incorporen 12 casos más non contabilizaos pa poner el total en 28.736–.

La evolución dende qu'Asturies.com entamó a calcular esti datu a lo últimu d'agostu foi la siguiente: 39, 46, 52, 83, 92, 92, 150, 210, 272, 334, 408, 508, 344, 252, 194, 125, 101, 78, 101 y 167. Otra manera, esta fin de selmana hebo 529 contaxos: 188 el vienres, 153 el sábadu y 188 ayeri, asitiándose la positividá a 7 díes nel 6 por cientu.

Hai que llamentar nestos trés díes 9 muertes cola enfermedá causada pol coronavirus SARS-CoV-2, 7 homes y dos muyeres. La peor cifra rexistróse'l sábadu, con 4, mentes que'l vienres perdieron la vida 3 ciudadanos y ayeri, 2, poniendo'l total dende qu'entamó l'andanciu en 1.387.

214 pacientes tán hospitalizaos con confirmación o sospecha de COVID-19, 34 más que'l xueves, mentes que na UCI hai 57, 3 menos.

Los sanitarios de Mieres, los primeros

Los profesionales del Hospital Vital Álvarez Buylla foron los primeros en vacunase esti meudía, una vegada que tolos internos en residencies y trabayadores que lo quixeren recibieran la primer dosis nes dos selmanes últimes. A lo llargo del día, alministróse tamién n'otros centos del país.

Na imaxe, un momentu de les vacunaciones d'esta mañana en Mieres. Semeya obra de POOL/ EFE/ J. L. Cereijido.

Contador Estadistiques