Asturies encara les restricciones nueves con 256 casos de COVID-19

|
Rafael Cofiño y Pablo Ignacio Fernández Muñiz pieslle 20 hores

El Gobiernu anunció'l llunes tamién el pieslle de la hostelería y tol comerciu, inclusive los supermercaos, a les 20 hores dende'l xueves nuna día d'aumentu importante de contaxos.

Un día depués de comunicar les restricciones nueves pa frenar l'espardimientu del coronavirus SARS-CoV-2, la Conseyería de Salú informó que nel día d'ayeri se rexistraron 256 casos nuevos de COVID-19. Ye la cifra más alta dende'l 27 de payares, cuando se detectaron 261, y la primer vegada que se sobrepasa la barrera de los 200 dende'l 5 d'avientu (226).

Na xornada fixéronse 4.045 pruebes de diagnósticu d'infeición activa, polo que la tasa de positividá asítase nel 6,43 por cientu. A falta de l'actualización oficial, el datu a 7 díes el domingu yera del 6 por cientu, mentes que la incidencia a 14 díes yera de 185 casos cada 100.000 habitantes.

Con estes cifres aporten les restricciones nueves, comunicaes ayeri pol conseyeru de Salú, Pablo Ignacio Fernández Muñiz, y el direutor xeneral de Salú Pública, Rafael Cofiño. A les yá anunciaes del zarru perimetral de Grau dende güei y l'adelantu del toque de queda a les 22 hores, dende'l xueves, sumóse tamién esi mesmu día'l pieslle de la hostelería y tol comerciu, inclusive los consideraos esenciales, a les 20 hores.

Dos finaos

Ayeri hebo que llamentar la perda de dos persones, un home de 90 años y una muyer de 83. Estes muertes aumenten la cifra de finaos cola enfermedá causada pol coronavirus SARS-CoV-2 hasta 1.389.

Hai hospitalizaos anguaño 236 pacientes con confirmación o sospecha de COVID-19, 22 más que'l domingu, a los qu'hai que sumar los 53 que tán na UCI, 4 menos con respeuto al día anterior.

Na semeya, Fernández Muñiz intervién ayeri, con Cofiño detrás.

Contador Estadistiques