Fraya la tendencia: la media diaria de contaxos vuelve a les cifres d'enantes de Navidá

|
Coronavirus SARS-CoV-2 verde-naranxa

De 101 baxara a 78, pero la selmana pasada tornó otra vegada a aumentar a 101.

Asturies rexistró la selmana pasada les mesma media de contaxos diarios que nel periodu que va del 14 y el 20 d'avientu. Si naquella ocasión hebo 705 casos nuevos de COVID-19 agora detectáronse 706, frayando asina la tendencia de descensu na segunda fola qu'entamó'l 17 de payares tres algamar el tope de 3.553.

Dende entós, con 508 de media diaria, esti datu baxó hata 344, 252, 194, 125, 101 y 78, tornando otra vegada agora a 101. Hasta esti momentu, a falta de conocer los datos oficiales de la pandemia, la Conseyería de Salú comunicó 27.543 positivos confirmaos por pruebes de diagnósticu d'infeición activa –una vegada actualizaos súmense otros 15 non contabilizaos que ponen el total en 27.558–, polos 26.837 d'hai una selmana.

Dende l'actualización última del miércoles, colos datos del martes, aportáronse les cifres siguientes: 122 casos nuevos el miércoles, 107 el xueves, 79 el vienres, 57 el sábadu y 135 ayeri. La tasa de positividá acumulada a 7 díes ye del 4,88 por cientu, cuando'l domingu pasáu taba nun 2,9 por cientu.

19 finaos

Nestos díes últimos hebo que llamentar 19 muertes: 2 el miércoles, 5 tanto'l xueves como'l vienres, 3 el sábadu y 4 na xornada d'ayeri. No que va d'andanciu llevamos 1.366 perdes –los datos oficiales sumen otres 4 más non contabilizaes–.

Hai hospitalizaes anguaño 188 persones con confirmación o sospecha de COVID-19, a los qu'hai que sumar otros 62 que tán na UCI. Son 17 y 1 menos que'l martes, de manera respeutiva.

 

Contador Estadistiques