Entramos nel 2019 y, como ye vezu, repasamos les informaciones más vistes n’Asturies.com mientres el 2018. ‘Asina se fabricó una noticia falsa (más) contra l’asturianu’, depués de la difusión nel dixital Okdiario d’una denuncia pública de la inesistente Plataforma Educación en Asturias, foi la que xeneró más interés.

El discursu institucional caberu de Javier Fernández como presidente d’Asturies señaló’l fortalecimientu del corazón industrial como’l mayor desafíu que tien per delantre’l país. “Reconversión industrial, evolución demográfica y financiación autonómica son los trés escenarios nos qu’Asturies xuega’l so futuru”, aseguró.

L'amazcaritáu sal de la capital pongueta hacia Cainava n'Añu Nuevu acompañáu polos solteros del pueblu a caballu o pollín.

Cola esceición de Canarias y Catalunya, onde tán prohibíes, Galicia, Illes Balears y Asturies, coles cuatro de la Feria de Begoña, son los territorios que celebraron nel 2017 menos corríes de toros. Nel llau contrariu ta Andalucía, que suma un total de 85 espectáculos.

Andecha Astur entama en Deva un añu más un homenaxe al escritor coincidiendo col aniversariu de la so muerte.

Ayeri, 27 d'avientu, cumpliéronse 34 años de la muerte n'accidente de tráficu d'Andrés Solar, ún de los meyores escritores en llingua asturiana a pesar de dexanos cuando tenía namái 29 años. Como ye vezu, esta organización política entama un actu na so memoria frente a la placa n'alcordanza que colocó nel cementeriu xixonés nel 2004, que va comenzar a les 13 hores de mañana cola presencia de la familia del autor.

La mazcarada allandesa celebra diez años dende la recuperación d'esta tradición.

Los personaxes que conformen la comparsa que percuerre'l Valledor nestes feches pidiendo l'aguilandu peles cases van salir esti sábadu, como tolos años dende hai una década cuando Xosé Antón Fernández 'Ambás' y Vezos Astures puxaron por recuperar Os Reises. El puntu d'aniciu va ser Villalaín a les 10.30 hores pa dirixise depués hacia San Salvador y finar en Fonteta.

El presidente d'Asturies, Javier Fernández, desplazóse a Madrid pa celebrar un conceyu xunto con Teresa Ribera y los dirixentes de Castilla y Lleón, y Aragón. Aseguró que la ministra "foi receptiva" a les demandes de les trés comunidaes autónomes xuníes na defensa del carbón y na esixencia d'una transición enerxética xusta.

Dixebra presenta esti vienres con una actuación n’Uviéu’l discu que recueye’l conciertu pol 30 aniversariu celebráu l’añu pasáu nesta mesma ciudá. Esta cita va ser “un puntu y aparte” pal grupu, que va renovar el repertoriu y va entrar n’estudiu darréu pa preparar los cantares nuevos del próximu trabayu, previstu pa la seronda.

Entitúlase 'LaKadarma Transdicional' y ta compuestu por semeyes de Leti Cernuda.

La banda de gaites nacida en Nava nel 2012, que ta acabante de treslladase a Piloña, pretende con esti calendariu "un exerciciu de reflexón so'l papel diferenciáu que la sociedá patriarcal atribúi a muyeres y homes nel ámbitu tradicional asturianu". Asina, inspiráu n'escenes rurales del sieglu pasáu, recueye doce semeyes nes que se camuden los roles tradiciones de xéneru.

El rector de la Universidá d’Uviéu, Santiago García Granda, recibió’l vienres en Xixón el Pegollu de los XXXIV Premios Andrés Solar qu'entama la XDLA. “Nun creo que faiga nada estraordinario”, afirmó depués de desear que l’asturianu “se pueda deprender y usar con normalidá, como cualquier otru idioma del mundu, porque ye la manifestación d’una cultura que ye la nuestra”.