LaKadarma propón una reflexón sobre los roles de xéneru nel so calendariu del 2019

|
Semeya chigre calendariu 2019 de LaKadarma

Entitúlase 'LaKadarma Transdicional' y ta compuestu por semeyes de Leti Cernuda.

La banda de gaites nacida en Nava nel 2012, que ta acabante de treslladase a Piloña, pretende con esti calendariu "un exerciciu de reflexón so'l papel diferenciáu que la sociedá patriarcal atribúi a muyeres y homes nel ámbitu tradicional asturianu". Asina, inspiráu n'escenes rurales del sieglu pasáu, recueye doce semeyes nes que se camuden los roles tradiciones de xéneru.

"D'esta manera, rescamplen ñidiamente los diferentes espacios, actividaes d'ociu o llabores cotidianos reservaos pa homes y muyeres; una división espacial y funcional que sirvió pa xustificar les diverses relaciones de poder que relegaben a les muyeres a un segundu planu", espliquen dende LaKadarma. L'actu de presentación d'esti calendariu va celebrase mañana, a les 19.30 hores, na Casa Cultura de L'Infiestu.

Mudanza

LaKadarma ta acabante de dar el pasu de camudar de conceyu cola fin de disponer d'un llocal d'ensayos fixu que siriviere tamién como llar de l'asociación. El Llagar de Sorribes, la Casa de Cultura Marta Portal de Nava o les Escueles de Buyeres-Ovín foron los llugares de los que fixo usu nesti tiempu la banda de gaites, toos ellos nun afayadizos pa la práutica musical.

L'ofrecimientu del Conceyu de Piloña d'un llocal que sí cumple coles necesidaes de LaKadarma llevó recién a decidir a los so miembros n'Asamblea Xeneral'l so treslláu al conceyu vecín. Nun comunicáu, la banda espresa "el nuestru agradecimientu más fonderu al pueblu de Nava, que nos acoyó, s’identificó con nós y nos apoyó ensin condición nestos años d’andadura".

Semeya obra de Leti Cernuda.

Contador Estadistiques