L'escritor xixonés Xuan Xosé Sánchez Vicente asocede a Xuan Bello como merecedor del Premiu Nacional de Lliteratura Asturiana, de calter triañal, que concede l’Academia de la Llingua Asturiana (ALLA). Nesta segunda edición presentáronse un total de trés candidatures pa esti gallardón que reconoz una trayeutoria.

Iniciativa pol Asturianu felicita a la firma francesa por ello y valora que cada vez más empreses usen l'idioma pa "coneutar d’una manera más direuta colos veceros".

Danone ta publicitando en grandes superficies los sos productos llácteos con un testu grande qu'acompaña'l logu pol so centenariu, cumplíu nel 2019, que rescampla "cola lleche fresca de 50 granxes familiares asturianes" (sic). La promoción sigue con un testu d'un ganaderu d'una d'eses granxes, tamién n'asturianu, anque emplega la toponimia castellanizada, yá derogada.

Candás va acoyer del 22 al 25 d’ochobre’l Regueriada Fest, un festival del llibru y la cultura asturiana con actividaes llúdiques, artes escéniques, música y gastronomía. La Durangoko Euskal Liburu eta Disko Azoka ye una de les referencies pa esti proyeutu conxuntu del Conceyu de Carreño y Política Llingüística.

El segundu trabayu de Silvia Quesada yá ye una realidá. Llámase ‘Prefiero ver llover’ y nél la cantante de Brañameana, que va presentalu’l vienres en direuto en La Felguera, exhibe “un cambiu estilísticu bastante importante” con respeuto a ‘La pena abierta’.

Sustitúi a Ione Belarrra, que pasa a ocupar el cargu de secretaria d'Estáu d'Axenda 2030.

“Lo que facemos equí ye un mensaxe pa los mineros de carbón d’Asturies, Macedonia Oeste o Silesia” apuntó’l vicepresidente de la Comisión Europea, Frans Timmermans, esti martes na sesión del Parllamentu Européu. Acudió a Strossburi pa presentar’l plan p’afrontar la descarbonización con un fondu esperáu de 100.000 millones pa los territorios mineros nos años próximos.

‘Suañando dende Areñes’ ye la obra nueva de Maxi Areñes, una colleición de rellatos y poemes que sigue la llinia de ‘Cuentinos dende Areñes’ y que’l músicu y escritor va presentar el vienres en L’Infiestu. Maitetxu Isla encárgase de les ilustraciones d’un trabayu lliterariu que'l xixonés define como “un diariu de suaños”.

‘Toi alicando’, ‘Soi mui grande’, ‘Pórtome de mieu’ y ‘Nun ḷḷoré’ son los cuatro modelos editaos pol Serviciu de Normalización Llingüística de Ḷḷena colos que se va ‘premiar’ a les neñes y neños que tengan qu’acudir al área de Pediatría del Centru de Salú de La Pola. Van repartise, nuna primer tirada, un total de 5.000 pegatines.

Los participantes na encuesta valoraron la importancia del emplegu de la llingua asturiana por parte d'Adrián Barbón na toma de posesión y n'otros discursos oficiales.

Yá ta disponible’l númberu 18 de ‘Ástor’, el cartafueyu de la Lliga Celta d’Asturies, que s’edita 30 años depués del 17 en formatu dixital con apéndices en castellanu y inglés. “Pretendemos avera-y a la xente la realidá de la cultura asturiana y amosala al mundu”, apunta’l so direutor Fernán Morán sobre esti proyeutu que se presentó na sede de l’Academia de la Llingua Asturiana (ALLA).