Silvia Quesada y Cerezal van protagonizar nel Toma 3 la primer grabación del añu d’Amosando

El ciclu Amosando, nacíu l’añu pasáu pa presentar les novedaes discográfiques de la música asturiana y promocionales en tol mundu al traviés d’Internet, torna esti 2020 nun escenariu nuevu. El chigre Toma 3 de Xixón va acoyer el día 28 la grabación de les actuaciones de Silvia Quesada y del grupu folk Cerezal.

Les trés sesiones anteriores tuvieron llugar nos estudios de Javier Lueje en Xixón, pelos que pasaron Xaime Martínez, L-R, Ún de Grao, D’Urria, Anabel Santiago y Eva Tejedor & Les Pandereteres. Unos conciertos y entrevistes a los músicos que sumaron más de 100.000 reproducciones na canal de YouTube y na páxina de Facebook de Musicasturiana, organizador d’Amosando xunto col propiu Lueje y Goxe Producciones.

Les actuaciones pasen agora de la zona oeste de la ciudá al centru, al Toma 3, cigre cultural asitiáu na cai Marqués de Casa Valdés. El públicu asistente va poder disfutar nesta primer cita de los cantares de ‘Prefiero ver llover’, el discu últimu de Quesada, y de ‘La cereza’l cielu’, álbum asoleyáu por Cerezal a lo último del 2019.

Con entrada de baldre, por mor de l’actual situación pola crisis sanitaria y pol calter intimista de la propuesta, l’aforu ye reducíu. Asina, la xente que quiera acudir a la grabación, prevista pal día 28 a les 17 hores, ha de participar nun sortéu pal que va tar abierta la inscripción hasta’l 23.