El Proyectu Fernán-Coronas facilita más de 25.000 documentos d’accesu llibre del legáu del escritor valdesanu

Trés años de trabayu de recuperación, ordenación y dixitalización del legáu del Padre Galo por parte de la Fundación Valdés-Salas dexen a disposición d'usuarios y investigadores más de 25.000 documentos d’accesu llibre. Ye’l Proyectu Fernán-Coronas, una collaboración público-privada con Política Llingüística y la Universidá d’Uviéu.

Entamóse nel 2021 “coles mires de recuperar los materiales documentales inéditos del Padre Galo (dispersos ente distintos propietarios, de dientro y fora d’Asturies, y en bona parte inaccesibles hasta esti momentu pal so estudiu y edición) y reunificar y sistematizar l’archivu personal del autor con criterios académicos consistentes”, espliquen dende la Fundación Valdés-Sala. En concreto trabayóse con siete archivos particulares.

El primeru n’estudiase foi’l de Germán Fernández, de Ḷḷuarca, que “abarca sobre manera los 15 últimos años de la vida Fernán-Coronas y aporta una documentación interesantísima sobre los trabayos que podemos llamar más asturianistes del autor”, esplicaba’l direutor xeneral d’Aición Cultural y Normalización Llingüística a Asturies.com nel 2021, cedíu desinteresadamente pal entamu d’esti proyectu A esti archivu siguió-y de Jesús Menéndez Peláez, donáu a la Fundación Valdés-Salas.

Posteriormente, clasificáronse y dixitalizáronse los trés archivos depositaos nel Real Instituto de Estudios Asturianos (RIDEA), pente medies d’un conveniu de colaboración ente esta institución y la Fundación Valdés-Salas). Son los de Modesto González Cobas, Oliva Avello y Teresa Méndez.

A ellos xúntense otros dos archivos qu’atropen una menor cantidá de documentos, “non por ello menos importantes”, conservaos por María Luisa Gutiérrez Rodríguez y pola Sociedá Popular La Regalina de Cadavéu, que los cedieron temporalmente pal so estudiu, catalogación y dixitalización. En total son 25.877 documentos de distinta naturaleza y temática, que se pueden consultar na so práutica totalidá nuna base de datos dividida en siete estayes: Llingüística, Lliteratura, Cultura popular, Correspondencia, Estranxeru, Varios y Cienfuegos.

Sicasí, el trabayu de recuperación del fondu documental del Padre Galo sigue, polo que’l Proyectu Fernán-Coronas veráse arriquecida nun futuru con materiales nuevos.

Presentación el miércoles

L’Aula Magna del Edificiu Históricu de la Universidá d'Uviéu va acoyer el miércoles la presentación de los trabayos de dixitalización d’esti legáu. Va ser a les 17 hores y van participar García; Xulio Viejo, profesor de la Universidá d’Uviéu; Adrián Martínez, investigador de la Universidá d’Uviéu; y Isidro Sánchez, direutor del Aula Valdés-Salas.