Barbón sal reelixíu presidente d’Asturies na primer votación

A les 13.02 hores la presidencia de la Xunta Xeneral, cuatro hores depués del arranque de la segunda sesión del Plenu d’Investidura, confirmaba a Adrián Barbón como presidente d’Asturies per cuatro años más. El socialista algamó l’apoyu de Convocatoria por Asturies, coalición cola que negocia conformar gobiernu, y Podemos.

23 votos favoratibles y 22 astenciones foi’l resultáu de la primer votación. Finalmente Cova Tomé dio un apoyu ‘críticu’ a Barbón –"un regalu políticu", catalogólu–, depués de la consulta fecha ayeri a la militancia, que nun tuvo qu’esperar a la segunda, como asocedió nel 2019, onde necesitaría una mayoría simple en llugar de l’absoluta.

D’esta forma, el llavianés encara la so segunda llexislatura al frente del Gobiernu d’Asturies, que, sicasí, podría nun ser monocolor. La FSA y Convocatoria por Asturies siguen negociando la entrada nel Executivu de la coalición y Barbón insistió nel Plenu nel so deséu de contar con estabilidá política nestos cuatro años.

Gobiernu “d’unidá progresista”

“L’oxetivu ye que’l 1 d’agostu haya un gobiernu d’unidá progresista n’Asturies”, apuntaría na so primer intervención, “que marque l’axenda de la tresformación económica y social d’Asturies, que ponga los retos per delantre, que sía valiente, que nun tenga mieu al cambiu, moderáu nes formes, educáu con tolos grupos y que tea abiertu a dialogar col restu de partíos”.

“Como presidente del Gobiernu d’Asturies gobernaré dende un óptica progresista pal conxuntu de la sociedá asturiana”, siguió pa depués asegurar que va “poner voz a los intereses d’Asturies gobierne quién gobierne en Madrid” y que’l so Executivu “va ser el que lidere’l cambiu d’Asturies, cola fuercia, el tesón, la gana y la historia d’esta comunidá autonóma que ta estrada d’oxetivos comunes, de retos algamaos y d’exemplos que son fundamentales na vida pública y que siempre llevo conmigo”.

Enantes dixera que “ta claro que l’arguyu d’identidá ye más necesario que nunca, porque equí sentí de too”, y criticó a aquellos que “quieren convertir a Asturies nuna diputación provincial, y nin siquiera”.

Na semeya, Barbón recibe l'aplausu de los diputaos socialistes depués de confirmase'l resultáu de la votación.