“Asturies necesita ilusión”, afirma Barbón, que promete trabayu dende la presidencia

Adrián Barbón salió elexíu esti llunes presidente d’Asturies, el novenu dende la Transición, por mayoría simple col sofitu de los dos diputaos d’Asturies pela Izquierda. Na so primer intervención na Xunta Xeneral tres la votación insistió en que ta abiertu al diálogu cola oposición y prometió trabayu y una xestión "rigurosa".

El socialista destacó que “Asturies necesita ilusión”. “Siento responsabilidá pa facer una xestión cercana, rigurosa, seria..., consciente de lo que nos xugamos n’Asturies y de la necesidá de ilusión que necesitamos, una responsabilidá qu’esixe trabayar y que me permita tar al altor de los mios predecesores, comenzando por Javier Fernández hasta los primeros presidentes, Rafael Fernández y Pedro de Silva. La responsabilidá va acompañame y nun sé otra de ser consciente d’esta responsabilidá que trabayar, trabayar y trabayar. Nun conozo otra receta”.

Tamién destacó’l fechu de que ye’l primer presidente nacíu depués de la Constitución española del 1978, “lo que significa qu’una xeneración nueva afronta la necesidá de gobernar Asturias y eso tien que significar gobernar de una manera meyor”. Tamién insistión nel ofrecimientu de diálogu a la oposición “pa qu’esta llexislatura nun sía una copia mala de l’anterior”.

Cultura en solitariu y creación de una conseyería de Ciencia

Nos díes previos a la sesión d’esta mañana na Xunta Xeneral, Barbón confirmó la so intención de crea una conseyería de Cultura, separtada d’Educación, onde va encaxar previsiblemente Política Llingüística y Normalización, según dexó entender en Twitter. Esta decisión llega a propuesta d’Asturies pela Izquierda y dellos coleutivos culturales.

Hoy he anunciado que en el Gobierno del Principado de Asturias habrá una Consejería de Cultura. Recojo así la propuesta que nos ha hecho @AngelaVallina, portavoz de @iuasturias y otros colectivos culturales, que pedían una nueva gobernanza para la Cultura y la llingua asturiana.

— Adrián Barbón (@AdrianBarbon) 12 de julio de 2019

Mentes, tamién anunció una Conseyería de Ciencia, Innovación y Universidá. “Los equipos investigadores de ciencia y los equipos que se dedique a la innovación reclamáronnons que toles competencies, que taben esperdíes, se concentren nuna conseyería única que llance un mensaxe a la sociedá de qu’hai una apuesta decidida y cierta por apostar por estos sectores estratéxicos pal futuru d’Asturies” afirmó.

Barbón va celebrar la toma de posesión previsiblemente’l sábadu. El domingu, según anunció, cuenta con dar a conocer la composición del Gobiernu próximu del país.

Na imaxe, l'anterior presidente Javier Fernández felicita a Barbón. Semeya obra d'Armando Álvarez.