El paru desciende n’Asturies nel 2022 en 2.911 persones, perbaxo de la media estatal

Asturies ameyoró les cifres del desemplegu nel 2022, con un descensu interañal del 4,49 por cientu, sicasí lloñe de la media estatal, que s’asitió nel 8,64 por cientu. El total de 61.887 paraos col qu’acabó l’añu’l país ye’l númberu más baxu rexistráu pa esti mes dende’l 2007.

Los datos d’avientu confirmaron el fin a cuatro meses siguíos d’aumentu del paru. La campaña de Navidá provocó una baxada de 1.114 demandantes d’emplegu, un 1,77 por cientu, dalgo superior a la media estatal, del 1,52 por cientu al contar con 43.727 menos y dexar el total en 2.837.653.

Les meyores cifres son les d’Andalucía (2,97 por cientu) y la Comunidad de Madrid (2,23), sacante les dos ciudaes autónomes. Mentes, La Rioja (0,68), Navarra (0,37) y Euskadi (0,08) son los únicos territorios onde aumenta’l desemplegu.

El 2022 acabó con 2.911 persones menos demandantes de trabayu pa dexar el total en 61.887 paraos. Ye la cifra más baxa p’avientu nos 15 años últimos y el ventenu primer mes siguíu de baxada interañal.

El porcentaxe más altu de descensu correspuende al sector primariu, con una baxada del 14,17 por cientu, rescamplando tamién la mengua na industria (6,80) y la construcción (6,55). En servicios, mentes, asitióse nel 3,87.

A nivel estatal, en comparanza col avientu pasáu, el paru baxó en 268.252 persones, un 8,64 por cientu menos, cuando n’Asturies quedó namái nun 4,49 por cientu. Illes Balears, con un 35,95 por cientu, presenta los meyores datos del 2022, siguíu de la Comunidad de Madrid (18,57) y Estremaúra (10,49), mentes que la menor mengua dase en Navarra (1,30) y Murcia (2,66).

Les ciudaes autonómes de Melilla (9,20) y Ceuta (0,04) son los únicos territorios onde medró’l desemplegu esti 2022.

Baxa la contratación

L’afiliación a la Seguridá Social n’Asturies asciende a 372.497, un rexistru que nun s’algamaba nun mes d’avientu dende’l 2010. Suma 2.298 más que n’avientu del 2021, un crecimientu del 0,62 por cientu, anque tamién menor que la media estatal.

No que respeuta a la contratación, firmáronse 19.014, de los que 4.984 foron indefiníos. Supón una baxada del 0,99 en comparanza col mes anterior y del 26,23 col añu pasáu.