El paru baxó en 17.272 persones n’Asturies esti 2021

Si nel añu de la pandemia los demandantes d’emplegu aumentaron en 12.113 persones, esti 2021, segundu del andanciu, ameyoráronse les cifres al rebaxar el total en 17.272. N’avientu púnxose frenu a 3 meses de medra de les llistes del paru al rexistrar 1.605 desemplegaos menos.

El descensu del 21,05 por cientu ye superior a la media estatal, que s’asitia nun 20,12 por cientu, con 782.232 paraos menos qu’hai un añu. La meyor cifra ye la d’Illes Balears, con un 33,63 por cientu, siguida d’Aragón (25,86 por cientu) y Catalunya (25,81 por cientu).

La construcción y la industria confírmense como sectores tractores, con baxaes del desemplegu del 22,08 y del 24,76 por cientu nos doce meses últimos, mentes que'l coleutivu ensin trabayu anterior rexistra una cayida de 2.194 paraos menos (26,22 por cientu). En términos absolutos, sicasí, el sector servicios lideró les baxaes, con 11.702 paraos menos nel últimu añu, un 19,85 por cientu.

Tamién medró l’emplegu nesti 2021, con 370.199 afiliaos a la Seguridá Social al sumar 9.751 cotizantes (2,71 por cientu).

Na media estatal

No que respeuta al últimu mes del añu, el paru baxó en 1.605 persones, un 2,42 por cientu, frayando una serie de trés meses d’aumentu de les cifres. La media estatal n’avientu tuvo nun 2,41 por cientu, con 76.782 demandantes d’emplegu menos que ponen el total en 3.105.905.

Los mayores descensos diéronse nes dos ciudades autonómes –Ceuta un 6,61 por cientu y Melilla un 4,91 por cientu– y na Comunidad de Madrid (6,25 por cientu) y la Comunitat Valenciana (4,68 por cientu). L’únicu territoriu onde medró’l paru foi Navarra, un 1,02 por cientu.