Asturies acumula cuatro meses d’aumentu del paru

Per cuartu mes aumenta’l númberu de demandantes d’emplegu n’Asturies. En payares medró en 362 persones, un 0,58 por cientu, cantidá dalgo menor que n’ochobre (850), col sector servicios como’l más afeutáu al concentrar el 95 por cientu de paraos nuevos (344).

El total de desemplegaos queda en 63.001, mentes qu’a nivel estatal, onde baxa’l paru en 33.512 ciudadanos, un descensu del 1,15 por cientu, asítiase en 2.881.380. Los meyores númberos rexístrenlos Ceuta (5,75 por cientu de mengua), la Comunitat Valenciana (4,32) y la Comunidad de Madrid (2,48), mentes qu’onde más medró foi en Illes Balears (4,55), Melilla (2,77) y La Rioja (1,45).

Magar l’aumentu del paru n’Asturies, ésta ye la xuba más moderada pa esti mes de los años últimos y el total más baxu en payares dende’l 2008. En comparanza con va un añu hai 3.402 demandantes d’emplegu menos, un 5,12 por cientu, cifra sicasí menor a la media estatal, que queda en 9,47 por cientu al rexistrar 301.307 paraos menos.

Los mayores descensos danse en Illes Balears (36,78 por cientu), Comunidad de Madrid (21,92) y Comunitat Valenciana (12,94), mentes que namái aumenta en Melilla (8,92 por cientu). Asturies acumula 20 meses siguíos de baxada en términos interañales.

Baxa l’afiliación a la Seguridá Social

L’afiliación a la Seguridá Social asítiase en 372.521 ocupaos, un 0,13 por cientu menos respeuto a ochobre al perder 484 afiliaos. Sicasí, hai 3.885 persones trabayadores más que va un añu (1,05 por cientu).

No que respeuta a la contratación, firmáronse esti mes un 16,8 por cientu menos d’alcuerdos llaborales que con respeuto a ochobre y un 38,2 en comparanza col mesmu mes del añu pasáu.