María del Carmen Siñeriz y Ines de Lavandera ganen los premios lliterarios en gallego-asturiano

Los dos premios lliterarios qu’entamen el Conceyu da Veiga y la Fundación Parque Histórico del Navia en collaboración cola Conseyería de Cultura, Política Llingüística y Turismu yá conocen ganadores. Son María del Carmen Siñeriz, nel casu del Río del Eo de poesía, y Inés Fernández (Inés de Lavandera), nel del Quiastolita de lliteratura infantil.

‘Pigureira de palabras esqueicidas’ ye la obra que presentó Siñeriz que mereció’l II Premio Ría del Eo de Poesía en Galego-asturiano, con una recompensa de 1.500 euros. La filóloga encargada de correición llingüística de la Secretaria Llingüística del Navia-Eo de l’Academia de la Llingua Asturiana y téunica de redaición del Diccionario Normativo d'Eonaviego nel que ta trabayando la institución, que yá ganó anguño’l II Concursu de Cotos del Conceyo da Veiga, asocede nel gallardón a Miguel Rodríguez Monteavaro, que l’añu pasáu escribió ‘Oi, que dice mamá que volvas’.

Pela so parte, Inés de Lavandera mereció’l II Premio Quiastolita de Lliteratura Infantil que convoca la Oficina de Coordinación Cultural y Llingüística del Parque Histórico del Navia. Tamién con una remuneración de 1.500 euros pal ganador, la maestra tapiega acudió al concursu col testu ‘Bolo’, convirtiéndose na segunda vencedora del mesmu depués d’Alberto Castro Gión, que compitiera con ‘Bandeira moura’, cuentu que ta acabante d'espublizase pa repartise de baldre nes escueles y nes biblioteques municipales de los conceyos que conformen el Parque Histórico.