El 31 d'agostu fina'l plazu pa presentar poemarios al II Premio Ría del Eo

Entámalu'l Conceyo da Veiga pa obres en gallego-asturiano y cuenta con una recompensa de 1.500 euros pal ganador.

Hasta un máximu de 3 trabayos pueden presentase per persona al II Premio Ría del Eo de Poesía en Gallego-asturiano, que l'añu pasáu mereció Miguel Rodríguez Monteavaro por 'Oi, que dice mamá que volvas'. Éstes son de temática llibre y han tar escritos siguiendo les 'Normas Ortográficas y Morfolóxicas del Gallego-asturiano' asoleyaes nel 2007 pola Secretaría Llingüística del Navia-Eo inxerta na Academia de la Llingua Asturiana.

Les obres serán en versu, con un mínimu de 250, mecanografiaos a doble espaciu con páxines numberaes. Nun han tar firmaes, pero sí llevar un títulu y alcuñu.

El plazu pa presentar los poemarios –trés copies xunto con un sobre zarráu colos datos del autor– fina'l miércoles viniente, día 31. Han entregase na Casa Conceyo d'A Veiga n'horariu de 9 a 15 hores.

Na semeya, Rodríguez Monteavaro, a la derecha, na entrega de la primer edición del premiu, celebrada en xineru, xunto con Antón García, direutor xeneral de Política Llingüística. La Conseyería de Cultura, Política Llingüística y Turismu collabora na organización del concursu.