El II Premio Quiastolita de Lliteratura Infantil recibe trabayos hasta'l miércoles día 31

La Fundación Parque Histórico del Navia entama esti concursu en gallego-asturiano.

El miércoles fina'l plazu d'entrega de creaciones al II Premio Quiastolita de Lliteratura Infantil. Ésti ta destináu a escritores adultos y tien una recompensa de 1.500 euros pal ganador, amás d'un diploma honoríficu.

Los rellatos pa participar nesti concursu lliterariu, que completa xunto col Premio Ría del Eo de Poesía en Gallego-asturiano del Conceyo da Veiga los premios pa la lliteratura en gallego-asturiano nos que collabora la Conseyería de Cultura, Política Llingüística y Turismu, han ser orixinales y inéditos en prosa, siguiendo les regles afitaes nes 'Normas Ortográficas y Morfolóxicas del Gallego-asturiano' asoleyaes nel 2007 pola Secretaría Llingüística del Navia-Eo inxerta na Academia de la Llingua Asturiana, con un máximu de trés por autor. La llargura máxina de los testos ye de 25 páxines "DIN A4, mecanografiadas a doble espacio, con foyas numeradas, redacción en formato Word, fonte Times New Roman y corpo de 12 puntos".

La remisión de les obres ha facese per corréu lletrónicu na direición administracion@parquehistorico.org, ensin firma nin alcuñu, con Premio Quiastolita de Lliteratura Infantil como asuntu. Un documentu axuntu con tolos datos acompañará los testos.

Na evolución de los mesmos por parte del xuráu va valorase que sían afayaízos pal públicu infantil, la so orixinalidá, la calidá de los recursos llitarios emplegaos y el so mensaxe, esto ye, la capacidá de coneutar col destinatariu, cola posibilidá de quedar ermu. L'añu pasáu'l ganador foi Alberto Castro Gión con ‘Bandeira moura’.

Na semeya, Castro Gión col diploma honoríficu del Quiastolita na entrega del premiu celebrada en Navia en payares en compañía del conceyal de Cultura de Navia, Gonzalo Asenjo; l'alcaldesa d'El Franco, Cecilia Pérez Sánchez; y el direutor xeneral de Política Llingüística, Antón García.