Espina anuncia que’l currículu d’Infantil nun va incluyir l’asturianu, lo qu’incumpliría la Llei d’Usu de 1998

“Nun contemplamos la inclusión del asturianu na etapa d’Educación Infantil actualmente”, aseguró esti martes na Xunta Xeneral la conseyera d’Educación, Lydia Espina, que tamién confirmó qu’ensin oficialidá nun va haber especialidá docente. L’ausencia del idioma nel currículu incumple la Llei d’Usu y Promoción del Bable/Asturianu.

Nuna intervención a partir d’una entruga de la popular María Gloria García Fernández “sobre qué criterios emplegó pa cuantificar la implantación de la oficialidá del asturianu y del eo-naviego na Educación”, Espina desveló esta decisión contraria a la llegalidá nun momentu nel que se tán preparando los currículos nuevos adaptaos a la LOMLOE.

Asina, l’artículu 10 de la Llei d’Usu, entituláu ‘Currículu’, nel so puntu 1 afita que “nel exerciciu de les so competencies, el Principáu d’Asturies garantizará la enseñanza del bable/asturianu en tolos niveles y graos, respetando sicasí la voluntariedá del so aprendizaxe. En tou casu, el bable asturianu deberá ser impartíu dientro del horariu escolar y será consideráu como materia integrante del currículu”.

Na so intervención, la conseyera esplicó que “na anterior llexislatura, y de manera esperimental sí qu’hebo n’Educación Infantil la enseñanza d’asturianu en dalgunos centros asturianos. Esa mesma llexislatura analizó cómo implantalo y tuvo una memoria económica inclusive de cómo organizar esa asignatura, pero en nengún momentu falaron de la oficialidá”, en referencia a la acusación de García Fernández de contar con un estudiu al respeuto, tomando como referencia los datos apaecíos nel ‘Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies’.

“Consideraben que podía aportar muncho n’edaes tempranes nel desarrollu de los nuesos neños y neñes”, apuntó sobre’l motivu de la puesta en marcha d’esi proyeutu esperimental, “pero finalmente esto nun tuvo efeutu y nun se modificó’l decretu 85 que ye necesario facer pa modificar el currículu de la etapa d’Educación Infantil”.

Darréu rescampló “que nel momentu actual tamos modificando los currículos de toles etapes educatives y yá-y digo, por si tien dulda o si me lo quier entrugar, que nun contemplamos la inclusión na etapa d’Educación Infantil actualmente”.

Negativa nueva de Madrid

Xusto depués de dar esta anuncia, Espina quixo “face-yu una reflexón” a la diputada popular. “Lo qu’a min sí m’importa, y ye importante pa la Conseyería d’Educación y pa tol Gobiernu, son los más de 250 interinos asturianos y asturianes, compañeros de Llingua Asturiana, qu’agora mesmo son docentes y nun tienen derechu a opositar, y nun tienen derechu a dir a otra comunidá por concursu de tresllaos. Eso sí que nos esmolez”, afirmó.

Nesti puntu comunicó una consulta que tuvo col Ministeriu d’Educación y Formación Profesional llueu de la PNL presentada por Podemos y aprobada pol Congresu, “¿y sabe los que nos dixeron? Que non, que nun ye posible facelo, nin per vía nacional nin per vía autonómica. ¿Y por qué? Porque necesitamos la oficialidá, esa oficialidá de la que vustedes se posicionaron en contra y nun quixeron nin falar. Y eso sí que ye una consecuencia direuta pa tolos nuesos compañeros que dan Llingua Asturiana anguaño”.

Na imaxe, Espina. Semeya obra d'Armando Álvarez.