Reciella ve “inaceptable” la vulneración de derechos del alumnáu d'Infantil al dexar fuera al asturianu

|
Lidya Espina visita escuela Infantil en Piloña

“Desiximos que la Conseyería d’Educación aproveche’l cambiu llexislativu y l’adaptación de los currículos p'acabar d’una vez por toes cola illegalidá que lleva ‘alcagüetando’ toos estos años”, espresa ‘Reciella. Families pol Asturianu’ llueu de l’anuncia fecha por Lydia Espina. Reclama al Executivu que “d’una vez tenga en cuenta los derechos de los neños y neñes asturfalantes”.

Los miembros d’esti coleutivu que trabaya la tresmisión interxeneracional del asturianu nel ámbitu social y familiar y la enseñanza, asina como la promoción y difusión de la llingua asturiana nes primeres edaes, ven “inaceptable que vuelvan a vulnerase los derechos del alumnáu d’Educacíón Infantil: “Queremos espresar el nuestru profundu maltar por esta decisión” dada a conocer ayeri na Xunta Xeneral pola conseyera, rescamplaron. “Nun contemplamos la inclusión del asturianu na etapa d’Educación Infantil actualmente”, aseguraba Espina.

“La Llei d’Usu, aprobada nel añu 1998, conseña de manera clara que l’asturianu ha tar presente en toles etapes educatives. Polo tanto ye una illegalidá, con toles lletres, que la Conseyería d’Educación lleve ensin aplicar esti mandáu casi trenta años”, denuncia Reciella. D’alcuerdu cola llei tol alumnáu d’Educación Infantil “tien derechu a recibir enseñances de Llingua Asturiana si esi ye’l so deséu tanto nel so primer ciclu (0-3 años) como nel segundu (3-6), que depende directamente de la Conseyería d’Educación”.

Nesti puntu recuerda que la etapa d’Educación Infantil “ye’l momentu nel que se produz l’alquisición del llinguaxe per parte de los neños y neñes, polo que son unos años especialmente importantes y sensibles pa la introducción d’éstos na enseñanza reglada. Y lo son nun doble nivel: pa aquelles families que partiendo del castellanu aspiren al plurillingüismu (castellanu, inglés, asturianu) pa los sos fíos y fíes. Pero tamién pa los rapacinos y rapacines (¡que n’Asturies siguen esistiendo!) que son falantes d’asturianu y a los que’l sistema obliga a recibir toles sos hores llectives nun idioma diferente del suyu, cuestión que ta sobradamente denunciada como improcedente por organismos internacionales como la UNESCO”.

Por último, califica “de ridículu” qu’Espina fale de proyeutos esperimentales “cuando sabemos que ta perfectamente implantáu en más de cuarenta centros asturianos dende qu’entamó la enseñanza de l’asignatura de Llingua Asturiana nos años ochenta”.

Esfuerzu de los docentes

Ello ye posible “gracies al esfuerzu personal de los docentes y equipos directivos d’estos centros, asina como les demandes de les families”, yá que la conseyería “namás permite que s’imparta esta asignatura cuando hai funcionarios de carrera nel centru que puedan facese cargu o bien cuando hai ‘horariu sobrante’ del profesoráu interín axudicáu”, esplica. “Dicho d’otra manera: la Conseyería d’Educación fai la ‘vista gorda’ cuando nun-y cuesta perres”, añade.

“Desiximos que la Conseyería d’Educación aproveche’l cambiu llexislativu y l’adaptación de los currículos p'acabar d’una vez por toes cola illegalidá que lleva ‘alcagüetando’ toos estos años. Que regule los conteníos a impartir na etapa, que dote del profesoráu que faiga falta y que d’una vez tenga en cuenta los derechos de los neños y neñes asturfalantes, víctimes silencioses de la dexación de funciones de l’Alministración”, rescamplen les families.

Na semeya, Espina nuna visita esti mes a la escuela infantil de L'Infiestu.

Contador Estadistiques