Una canción na variante senabresa del asturlleonés gana’l XIII Premiu Camaretá al Meyor Cantar

Carla Armas y Rubén García, compositor zamoranu, llevaron el XIII Premiu Camaretá al Meyor Cantar con un tema na variante senabresa del asturlleonés. ‘El que conoz a tierra’ foi la canción escoyida como la merecedora d’esti gallardón na gala celebrada’l sábadu nel Niemeyer.

Los ganadores defendieron la so propuesta con una banda con batería, tecláu, flauta y instrumentos de cuerda qu’acompañó la voz d’Armas, convenciendo al xuráu d’esta edición pa llevar la recompensa de 6.000 euros, un troféu conmemorativu, la grabación d'un videoclip y promoción. Los otros finalistes a meyor cantar del 2020 y los seis primeros meses del 2021 foron L-R, con ‘Veis volver’ (lletra de Leticia González ‘Baselgas’); ¿Aú?, con ‘Tomasín’ (lletra de Ruma Barbero); y la Banda Gaites Camín de Fierro, con ‘Flacos y ensin peinar’ (lletra de Toli Morilla).

La llista de ganadores del Premiu al Meyor Cantar, qu’incorporó l’añu pasáu l’apellíu ‘Camaretá’ como reconocimientu a esta agrupación cultural y musical, complétenlu Toli Morilla, con ‘Azul y gris’ (2007); Herbamora, con ‘Nosh’ (2008); Alfredo González, con ‘La nada y tu’ (2009); Xera, con ‘Tierra’ (2010); Skama la Rede, con ‘Condenáu’ (2011); Asturiana Mining Company, con ‘Si nun conoces Vaḷḷouta’ (2012); Taranus, con ‘Ensin ti’ (2013); la Banda de Gaitas El Trasno, con ‘Volviche’ (2014); Anabel Santiago, con ‘La lloca’ (2016); Luis Núñez y los Folgazanes, con ‘La ñeve y la esmeralda’ (2017); Lafu y Rebeca, con ‘Les sombres de la yerba’ (2019); y Rodrigo Cuevas, con ‘Rambalín’ (2020). La gala d’Avilés emitióse nesta ocasión en direuto per TPA.