Carla Armas y Rubén García, L-R, ¿Aú? y Camín de Fierro defenden los sos temes nel Niemeyer

|
Cartelu gala XIII Premiu Camaretá al Meyor Cantar recortáu

Entovía queden entraes disponibles pa la final del XIII Premiu Camaretá al Meyor Cantar.

Mañana a les 22.30 hores va celebrase la gala d'esti gallardón qu'escueye'l meyor tema n'asturianu y gallego-asturiano del 2020 y los seis primeros meses del añu del 2021. Los cuatro finalistes son Carla Armas y Rubén García, con ‘El que conoz a tierra’ (lletra de García); L-R, con ‘Veis volver’ (lletra de Leticia González ‘Baselgas’); ¿Aú?, con ‘Tomasín’ (lletra de Ruma Barbero); y la Banda Gaites Camín de Fierro, con ‘Flacos y ensin peinar’ (lletra de Toli Morilla).

Nel Auditoriu del Centru Niemeyer va tar tamién presente Rodrigo Cuevas, vencedor l'añu pasáu con 'Rambalín', que va dar un conciertu curtiu mientres el xuráu decide'l ganador d'esta edición. Les recompenses son 6.000 euros, un troféu conmemorativu, la grabación d'un videoclip y promoción.

Les persones interesaes n'acudir a la final tienen entovía posibilidá d'acutar asientu nesti enllaz o retirar invitación nel propiu Niemeyer, na Llaboral (Xixón) o nel Centru d'Información Turística del Principáu d'Asturies (Uviéu). Al ser televisada la gala pela TPA en direuto, encamiéntase que'l públicu acceda pronto al recintu, a les 22.15 hores.

Contador Estadistiques