El XII Premiu Camaretá al Meyor Cantar foi pa ‘Rambalín’ de Rodrigo Cuevas por unanimidá

|
'Rambalín' Rodrigo Cuevas primer planu XII Premiu Camaretá al Meyor Cantar

Ensin públicu per primer vez pola situación sanitaria pola pandemia, el vienres celebróse nel Fantasio de Navia la gala del XII Premiu Camaretá al Meyor Cantar. El tema ganador foi ‘Rambalín’, l’habanera dedicada a Alberto Alonso Blanco ‘Rambal’, persona bien conocida nel Xixón de los años 60 y 70, de Rodrigo Cuevas.

Cuatro pieces pasaran enantes el corte d’esti gallardón valoráu en 6.000 euros qu’entrega la Conseyería de Cultura, Política Llingüística y Turismu y, que nesta edición, escoyía la meyor del 2019 y los seis primeros meses del 2020. Mapi Quintana foi la primera en defender la de so, ‘Cantar pa durmir un ninín’, pa depués repetir nel contrabaxu cola banda de Cuevas con ‘Rambalín’.

Los terceros foron Slum Suit, que presentaron ‘L’espeyu’, con lletra de Pablo Texón, pa finar Silvia Quesada con una interpretación teatralizada de ‘La mesma revolución’. Lafu y Rebeca, ganadores de la edición pasada con ‘Les sombres de la yerba’, dieron un conciertu breve nel tiempu que’l xuráu, formáu polo músicos Alicia Álvarez, Pablo Moro y Naomi Suárez, la periodista y escritora Aitana Castaño, y la filóloga y profesora Mercedes Ruisánchez, baxo la presidencia del direutor xeneral de Política Llingüística, Antón García, decidía’l cantar ganador.

Ésti foi, por unanimidá, pa ‘Rambalín’, l’homenaxe de Cuevas a Rambal incluyíu nel so discu últimu, ‘Manual de Cortejo’, con lletra del uvieín y música de Raül Refree. Rambal, homosexual reconocíu naquellos tiempos difíciles pa les llibertaes, foi asesináu en Cimavilla nel 1976, crime que quedó impune por al nun dar la investigación policial col autor.

El palmarés d’esti gallardón, qu’esti incorporó l’apellíu ‘Camaretá’ como reconocimientu a esta agrupación cultural y musical, complétenlu Toli Morilla, con ‘Azul y gris’ (2007); Herbamora, con ‘Nosh’ (2008); Alfredo González, con ‘La nada y tu’ (2009); Xera, con ‘Tierra’ (2010); Skama la Rede, ‘Condenáu’ (2011); Asturiana Mining Company, ‘Si nun conoces Vaḷḷouta’ (2012); Taranus, con ‘Ensin ti’ (2013); la Banda de Gaitas El Trasno, con ‘Volviche’ (2014); y Anabel Santiago, con ‘La lloca’ (2016); Luis Núñez y los Folgazanes, con ‘La ñeve y la esmeralda’ (2017); y Lafu y Rebeca, con ‘Les sombres de la yerba’ (2019). La gala de la decimosegunda edición, que s’emitió en diferío’l sábadu per TPA, conducióse en gallego-asturiano y asturianu.

Versión de 'Rambalín' grabada n'abril d'esti añu nel confinamientu.

Contador Estadistiques