El XIV Premiu Camaretá al Meyor Cantar va contar na gala de Xixón per primer vez con trés finalistes

Per primer vez na so historia’l Premiu al Meyor Cantar, qu’incorpora dende’l 2020 el nome Camaretá, va contar con trés finalistes. El xuráu de la decimocuarta edición escoyó a Algaire, Mostru l’Horru y Dixebra pa defender los sos temes na gala d’ochobre nel teatru de la Llaboral.

Cuando arrancó nel 2007 esta iniciativa que busca premiar al meyor cantar n’asturianu o gallego-asturiano del añu anterior veníen escoyéndose cinco finalistes, dalgo que camudó nel 2014, cuando cuatro pasaron el corte. Dende entós esta cantidá foi la norma, sacante nel 2015 cuando hebo cinco otra vegada.

Esta edición va ser la primera na qu’haya 3. Éstos son Algaire, que presenta ‘Coral y maera’ con lletra y música de Luis Ángel Fernández Santos; Mostru l’Horru, con ‘Fíu d’un pueblu’ con lletra de Francisco Méndez y música de Yannick Gutiérrez; y Dixebra, con ‘Como’l mar’, firmada por Primi Abella. La gala va celebrase’l 22 d’ochobre na Llaboral y nella van participar tamién los ganadores del añu pasáu, Carla Armas y Rubén García, con ‘El que conoz a tierra’, escrita na variante senabresa del idioma.

El tema ganador va recibir una recompensa de 6.000 euros. Podíen participar nesta convocatoria, que busca “consolidar, prestixar y arriquecer la creación musical tanto n’asturianu como en gallego-asturiano”, los cantares inéditos asoleyaes nel 2021 y los cinco primeros meses del 2022.

Na semeya, fachada del teatru de la Llaboral.