Iniciativa demanda a Política Llingüística que tresllade al ministeriu una quexa pola esclusión del asturianu de les ayudes a la traducción

Refugada por ser una "llingua non recoyida como oficial nel Estatutu d'Autonomía de la comunidá autónoma", foi la respuesta que recibió una editorial al solicitar una subvención de la llinia nueva d’ayudes pa la traducción ente llingües estatales del ministeriu. Iniciativa pol Asturianu demanda a Política Llingüística la presentación d’una quexa por dexar fuera al asturianu de la mesma.

Les bases de la convocatoria, como denunció en mayu la Xunta pola Defensa de la Llingua Asturiana (XDLA), escluyíen al idioma, al afitar que les ayudes destinábense al “fomentu de la traducción de llibros ente llingües oficiales del Estáu español”. “La obra oxetu de traducción habrá tar yá publicada en cualquiera de les llingües oficiales del Estáu y tar escrita por un autor español”, añadía al empar qu’especificaba que se “consideren llingües oficiales del Estáu aquelles qu’asina lo recoyeren les comunidaes autónomes nos sos estatutos d’autonomía con esa denominación”.

“Esti apunte tien la intención clara de dexar fuera al asturianu y a tola so producción cultural, amás d'a los sos creadores, que pal ministeriu paez que nun tienen los mesmos derechos que los qu'usen el castellanu, catalán, gallegu o vascu”, criticaba la XDLA. Ello nun quitó pa qu’una editorial del país presentara un proyeutu pa trayer una obra del gallegu al asturianu, recibiendo la respuesta de que yera refugada por ser una "llingua non recoyida como oficial nel Estatutu d'Autonomía de la comunidá autónoma", según comunicó Iniciativa pol Asturianu esta mañana.

“Situaciones como éstes demuestren que la falta d'oficialidá ta xenerando qu'empreses culturales d'Asturies nun puedan acceder a les ayudes públiques y otres oportunidaes a les que sí que pueden acceder otres. Mesmo que pasa colos escritores, traductores, músicos y otros trabayadores del ámbitu de la cultura”, espresó esti coleutivu. "Ye un exemplu más pa ver que la declaración d’oficialidá pa la llingua asturiana va valir pa nun perder fondos estatales", añadió.

Hasta que s’igüe l’anomalía na que vive l’idioma, Iniciativa pol Asturianu demanda a Política Llingüística que presente una quexa Ministeriu de Cultura y Deporte, asina como qu’aproveche posibles futures presencies nel Conseyu de Llingües Cooficiales pa “denunciar esti tipu de discriminaciones a la llingua asturiana”.

Na imaxe, llar del Ministeriu de Cultura y Educación. Semeya obra Luis García baxo llicencia CC BY-SA 3.0.