“Esta PNL tamién intenta que’l Gobiernu encamiente a la Xunta a qu’entame la reforma del Estatutu pa reconocer la oficialidá”, afirma en Madrid Llera

Na tarde d’esti martes va aldericase nel Congresu la Proposición Non de Llei sobre la Realidá Plurillingüe y Igualdá Llingüística, firmada por un piñu de formaciones polítiques y que va defender na tribuna EH Bildu. Representantes d’Iniciativa pol Asturianu, que ta detrás d’esta propuesta qu’inclúi un puntu que se refier a la oficialidá del asturianu, desplazáronse a Madrid pa presenciar la sesión en direuto.

Esta mañana les entidaes que conformen la Plataforma Igualdá Llingüística, esto ye Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua, Centre Internacional Escarré per a les Minories Ètniques i Nacionals (Ciemen), Escola Valenciana-Federació d'Associacions per la Llengua, Obra Cultural Balear y la propia Iniciativa pol Asturianu, entamaron una rueda de prensa nel esterior del Congresu, en concreto na Escalinata de la Puerta de los Lleones, pa esplicar les sos demandes que tienen el so niciu nel documentu ‘Pluralidá llingüística: llibertá, igualdá y democracia’, y que les formaciones polítiques recoyeron como base pa esta PNL. Iván Llera, presidente del coleutivu asturianu, que viaxó a Madrid xunto con Xuan Pandiella, encargóse de presentar a los medios madrilanos la cuestión asturiana.

“La situación del asturianu n’Asturies ye mui diferente a la que viven otres llingües del Estáu. Evidentemente tenemos problemes comunes, pero nel nuesu casu la situación va muncho más allá porque nos enfrentamos a problemes como dificultaes pa escoyera l’asignatura d’asturianu llibremente nos colexos, pa rexistrar una empresa o simplemente pa poner una esquela”, apuntó’l periodista xixonés. Darréu esplicó que “ún de los puntos d’esta PNL ye intentar arrancar el compromisu de qu’el Gobiernu d’España encamiente a la Xunta Xeneral del Principáu d’Asturies a qu’abra’l procesu de reforma del Estatutu d’Autonomía que mos permita reconocer la oficialidá del asturianu”.

Por último rescampló que “hai que tener en cuenta y recordar que la Constitución Española, nel so artículu 3.2, establez que les llingües propies han de ser oficiales en cada territoriu según l’Estatutu d’Autonomía y nesti momentu esta circunstancia ye una anomalía constitucional que lleva repitiéndose n’Asturies dende va cuarenta años y creemos que ye’l momentu de solucionala”.

El conteníu de la propuesta

La Proposición Non de Llei sobre la Realidá Plurillingüe y Igualdá Llingüística preséntenla Xuníes Podemos y les sos confluencies, ERC-Sobiranistes, Junts y PDeCAT, EAJ-PNV, Más País, CUP, BNG, Compromís y EH Bildu, formación que va encargase de defendela, en concreto la diputada Mertxe Aizpurua. La mesma inclúi 7 puntos con otros tantos encamientos al Gobiernu estatal, eliminando finalmente’l terceru, que reclamaba que l’Aministración del Estáu “funcione nes diferentes llingües independientemente del so allugamientu físicu, ente otros, nes Cortes xenerales, los tribunales Constitucional, Supremu y Audiencia Nacional, y promoviendo’l so usu n’organismos como l’Axencia Tributaria o la Seguridá Social o otres empreses y entidaes públiques como RTVE” al nun tar esta cuestión ente les competencies del Executivu.

El primeru afala a “entamar toles aiciones pa que les llingües propies distintes del castellanu gocien del mesmu reconocimientu y los sos falantes los mesmos derechos y deberes que se reconocen al castellanu”. El documentu sigue solicitando que se garantice’l conocimientu d’estos idiomes nos sos territorios respeutivos.

El puntu cuatru ye’l que se redautó pensando sobre manera nel casu asturianu y aragonés, yá que demanda “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”. Nos siguientes afóndase en cuestiones como garantizar la igualdá llingüística, finar cola imposición esclusiva del castellanu na normativa estatal, permitir l’usu de los idiomes propios ente alministraciones d’un mesmu espaciu llingüísticu y esixe un “respetu real, basáu en derechos y deberes y na actuación comprometida de tolos poderes del Estáu”.

La sesión de Congresu d’esta tarde va principiar a les 15 hores, siendo esta cuestión la cuarta que se va trata nel orde del día, polo que s’espera que l’alderique tenga llugar pasaes les 17 hores.

Na semeya, Llera atiende a la prensa madrilana nel esterior del Congresu.