El Congresu encamienta al Gobiernu a “impulsar y apoyar” una reforma estatutaria n’Asturies pa declarar la oficialidá
- “Esta PNL tamién intenta que’l Gobiernu encamiente a la Xunta a qu’entame la reforma del Estatutu pa reconocer la oficialidá”, afirma en Madrid Llera
- “Son les nueses llingües les que se ponen en riesgu, y dalgunes, como l’asturianu o l’aragonés, con muncha más gravedá”, denunció Aizpurua nel Congresu
- El PSOE asume la postura de la FSA y vota a favor de la oficialidá
- “Bienveníos sían los apoyos que dende otres alministraciones vengan a reafirmar lo qu’esti Gobiernu lleva nel so compromisu eleutoral”, apunta Piñán
- “Hai qu’abrir cuanto primero esi alderique imprescindible, calmáu y asosegáu sobre la reforma estatutaria”, demanda Llera
- “Abrimos una ventana, pero queremos abrir toles ventanes”, apunten les entidaes que presentaron la PNL nel Congresu
|
11 Marzu, 2021 por Pablo R. Guardado
- Inicie sesión o rexístrese pa espublizar comentarios
Finalmente la PNL sobre la Realidá Plurillingüe y Igualdá Llingüística votóse por puntos, lo que permitió que saliera alantre’l que se refería a la oficialidá del asturianu y del gallego-asturiano. El Congresu encamienta asina al Gobiernu a “impulsar y apoyar” una reforma estatutaria n’Asturies pa facer oficial les dos llingües propies del país.
L’apoyu del PSOE permitió que’l puntu 4 de la propuesta presentada por Xuníes Podemos y les sos confluencies, ERC-Sobiranistes, Junts y PDeCAT, EAJ-PNV, Más País, CUP, BNG y Compromís, defendida’l martes nel Congresu por EH Bildu, que recoyía les demandes de la Plataforma Igualdá Llingüística, de la que forma parte Iniciativa pol Asturianu, saliera alantre con 194 votos a favor, 153 en contra y 1 astención. En concreto encamentaba al Gobiernu estatal a “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”, en referencia nidia al casu asturianu y al aragonés.
Los otros dos puntos que tuvieron el preste de la Cámara Baxa –yeren 8, pero’l númberu 3 retirárase enantes de llevalu a Plenu– foron el númberu 7, que llamaba a “permitir l’usu alministrativu de les distintas llingües ente territorios del mesmu espaciu lingüísticu, dientro y fuera de les fronteres alministratives, ensin barreres y firmando alcuerdos pa la receición recíproca de medios de comunicación dientro d’esos espacios llingüísticos”, y el final, el 8, que reclama “respetu real, basáu en derechos y deberes y na actuación comprometida de tolos poderes del Estáu” pa coles llingües diferentes al castellanu.
El PSOE y los grupos solicitantes, asina como los diez coleutivos de la Plataforma Igualdá Llingüística, negociaran enantes y depués de la presentación de la PNL la enmienda socialista, ensin alcuerdu por entender el partíu de Gobiernu qu’en dellos aspeutos teníen “un imposible encaxe cola llexislación vixente n’España ensin una reforma llegal y constitucional”, anque finalmente foi posible la votación por puntos que permitió l’aprobación de 3 de los 7.
Efrén d'Andrés
