El Congresu va aldericar sobre la oficialidá del asturianu y la igualdá llingüística

Una proposición non de llei presentada esti xueves por diez formaciones polítiques nel Congresu busca encamentar al Gobiernu estatal a, ente otres cuestiones, “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidá del territoriu onde se falen”. La Plataforma Igualdá Llingüística ta tres esta propuesta.

El Plenu del Congresu va aldericar poro sobre esta iniciativa presentada por Xuníes Podemos, ERC-Sobiranistes, Junts y PDeCAT, EAJ-PNV, EH Bildu, Más País, CUP, BNG y Compromís. Ésta busca defender la diversidá llingüística del Estáu y la posibilidá d’usar estos idiomes en toles instituciones.

Asina, nel puntu 1 de los 8 que conformen la proposición non de llei encamiéntase al Executivu a “entamar toles aiciones pa que les llingües propies distintes del castellanu gocien del mesmu reconocimientu y los sos falantes los mesmos derechos y deberes que se reconocen al castellanu”. El documentu sigue solicitando que se garantice’l conocimientu d’estos idiomes nos sos territorios respeutivos, y que l’Aministración del Estáu “funcione nes diferentes llingües independientemente del so allugamientu físicu, ente otros, nes Cortes xenerales, los tribunales Constitucional, Supremu y Audiencia Nacional, y promoviendo’l so usu n’organismos como l’Axencia Tributaria o la Seguridá Social o otres empreses y entidaes públiques como RTVE”.

El puntu 4, nel qu’entra la cuestión del asturianu, llama al Gobiernu estatal a “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”. Ente otros aspeutos, tamién se reclama que se permita l’usu alministrativu ente territorios del mesmu espaciu llingüísticu.

Esta PNL, que se va aldericar en Plenu nel Congresu, naz d’una propuesta de la Plataforma Igualdá Llingüística. Ésta ta formada por Acció Cultural del País Valencià, Plataforma per la Llengua, Òmnium, A Mesa pola Normalización Lingüística, l’aragonesa Nogará, Kontseilua, Centre Internacional Escarré per a les Minories Ètniques i Nacionals (Ciemen), Escola Valenciana-Federació d'Associacions per la Llengua y Iniciativa pol Asturianu, coleutivu que trabayó pa tratar de da-y una vuelta a la proposición cola fin d’ampliar l’abanicu de partíos que se sumaran a esta demanda pol reconocimientu de la diversidá llingüística y los derechos de los falantes.