“Sorprendiónos el tonu del PSOE”, señala Llera

Iniciativa pol Asturianu llamenta la falta d'alcuerdu sobre la PNL porque suponía "consiguir coses mui bones p’Asturies".

“Pela nuesa parte ye una pena que nun salga alantre la PNL, porque tábemos dispuestos a un alcuerdu y yera consiguir coses mui bones p’Asturies”, apuntó Iván Llera, presidente d’Iniciativa pol Asturianu, que tuvo presente nes negociaciones y na sesión d’ayeri nel Congresu xunto con respresentantes d'otres asociaciones que participen na Plataforma Igualdá Llingüística. “Sorprendiónos el tonu del PSOE”, señaló con respeuto a la fixación de posiciones.

La delegación del coleutivu sigue entovía en Madrid, onde esta mañana tuvo un alcuentru informal col diputáu socialista por Asturies Roberto García Morís –ayeri los sos representantes tuvieron la ocasión de falar con Sofía Fernández Castañón (Xuníes Podemos) y Isidro Martínez Oblanca (Foro)–. “La nuesa intención ye siguir trabayando p’algamar consensos”, confirmó’l periodista xixonés.

Otra manera, nun ta descartada entovía la votación mañana de la PNL sobre la Realidá Plurillingüe y Igualdá Llingüística por puntos, una posibilidá que se ve con bonos güeyos dende Iniciativa pol Asturianu. El puntu 4 encamienta al Gobiernu estatal a “impulsar y apoyar reformes estatutaries pa la oficialidá de les llingües propies qu’entovía nun son oficiales nuna parte o la totalidad del territoriu onde se falen”.

Na semeya, proponentes de la PNL ayeri nes escaleres del Congresu, con Llera primeru a la derecha de la primer filera.