Llaviana pasa a tar n'alerta naranxa

El presidente Adrián Barbón llama a tolos llavianeses de 13 a 18 años a facer una PCR.

El Serviciu de Vixilancia Epidemiolóxica propunxo declarar l'alerta naranxa en Llaviana pol biltu de COVID-19 que tien el conceyu con orixe en dos rapazos, que yá acumula 7 contaxos más que ponen el total agora en 32, midida que va aprobar el Gobiernu. Dende'l día 1, nesti llugar de la cuenca del Nalón rexistráronse 42 casos.

L'anuncia diola Barbón esta mañana na rueda de prensa sobre l'estáu de la pandemia anguaño nel país. Al igual qu'asocedió colos cinco conceyos del oriente que pasaron pel mesmu estáu del 26 d'agostu al 8 de setiembre, l'alarma va ser per dos selmanes, momentu nel que se va revisar la situación epidemiolóxica.

"Nestos conceyos, los primeros, la incidencia del coronavirus baxó a la metá", recuerda l'ex alcalde de Llaviana, qu'apuntó que la declaración de l'alarma naranxa "ye un toque d'atención que nos sirve pa nun dar pasos más duros y contundentes, porque'l siguiente pasu ye'l confinamientu perimetral". Entes les aiciones que se van tomar citó "midíes más restrictives, midíes pa torgar axuntamientos de xente, refuerciu policial y midíes d'hixene na cai mayores".

Pruebes masives

Al empar fixo un llamáu a tolos llavianeses de 13 a 18 años, "que ye onde se detectó mayor incidencia", pa que fixeren una prueba de PCR. "Siempre actuamos de la mesma manera, detectando un problema, en base al criteriu de los téunicos", destacó.