Los casos de COVID-19 nun paren de medrar: 83 diarios de media na selmana última

Nos trés díes últimos Asturies rexistró 287 contaxos, de los que 133 se detectaron el sábadu, la cantidá más alta dende marzu y la mayor de la segunda fola de COVID-19. Esta selmana la media de casos diarios foi de 83, cuando nes dos anteriores foi de 52 y 46, lo qu’amuesa l’empeoramientu de la situación epidemiolóxica del país.

La Conseyería de Salú anunció 96 casos el vienres, 133 el sábadu y 58 ayeri, a los qu'hai que sumar los 93 del xueves. Esta cifra ponen el total de la serie en 4.625 casos, polos 4.042 del domingu pasáu.

La media diaria nestos siete díes últimos foi de 83. Nes trés selmanes pasaes la cifra rexistrada quedó en 39, 46 y 52, con una medra progresiva de los casos.

44 hospitalizaos

Na UCI anguaño hai 11 pacientes, 1 menos que’l xueves, mentes qu’en planta aumentaron en 4 persones pa quedar en 33. Nestos díes 2 persones recibieron l’alta epidemiolóxica, que ponen el total de curaos en 2.204.

Na semeya, autocovid instaláu nel recintu ferial de La Pola Llaviana pa controlar el biltu d'esti conceyu.