L’alerta naranxa nel Nalón amplíase a Samartín del Rei Aurelio y Llangréu

|
Comité de Siguimiento de la Normalidá Nueva alerta naranxa Samartín y Llangréu

Los efeutos del biltu de Llaviana tán dexándose notar nel restu de la cuenca del Nalón. L'aumentu de la incidencia de la COVID-19 llevó a la Conseyería de Salú a ampliar l’alerta naranxa a los conceyos de Samartín del Rei Aurelio y Llangréu, con restricciones a la hostelería del llugar y llende a les agrupaciones de persones nos chigres.

El conseyeru de Salú, Pablo Fernández Muñiz, anunció ayeri esta decisión tres finar la xunta del Comité de Siguimiento de la Normalidá Nueva, presidida por Adrián Barbón y na que tamién participa la Delegación del Gobiernu estatal n’Asturies y la Federación de Conceyos. La razón, según esplicó, ye una incidencia de casos alta, mayor que la media del país.

L’alerta naranxa, na que lleva Llaviana dende’l vienres, ye una llamada a les instituciones llocales, sectores socioeconómicos y a la ciudadanía pa que, de manera conxunta y coordinada cola Alministración sanitaria, faigan una vixilancia intensiva y estremen les midíes de control. Non implica restricciones, sinón intensifica les aiciones de proteición, vixilancia y seguridá na zona, anque nesta ocasión sí impón a estos trés conceyos la prohibición del consumu en barra nos chigres y una llende de seis persones por mesa.

Siete brotos nuevos

Otra manera, comunicáronse ayeri al Ministeriu de Sanidá 7 biltos nuevos con un centenar de casos positivos y 153 contautos estrechos entovía en siguimientu. Anguaño hai 15 brotos activos nel país –5 más que la selmana pasada–, que provocaron 220 positivos, y 472 persones tán en siguimientu venceyaos a estos casos.

Na semeya, un momentu de la xunta del Comité de Siguimiento de la Normalidá Nueva d'ayeri.

Contador Estadistiques