“Nun vamos en broma, colos puestos de trabayu de los compañeros nun se xuega”, asegura Fernando González

“Lo que pidimos ye dalgo tan cenciello como qu’una empresa pública como EBHI cumpla unos alcuerdos firmaos nel 2017 y cola tasa de reposición pal sector públicu”, esplica Fernando González Rodríguez, ún de los cuatro trabayadores en fuelga de fame dende hai 21 díes, nun videu p’Asturies.com. Esti xueves ta convocada una concentración na Xunta y una manifestación dende L’Humedal.

El pasáu 13 de mayu, cuatro trabayadores de la European Bulk Handling Installation (EBHI), empresa de la que l’Autoridá Portuaria de Xixón ye la principal aicionista con un 68 por cientu de los títulos, zarrábense nel llocal del Comité d'Empresa nes instalaciones de la compañía n’El Musel y poníense en fuelga de fame por un ERTE decidíu de manera unillateral y pol despidu en diferío de 7 compañeros al nun cumplir coles tases de reposición. Dende esi día pasaron un total de 21 ensin solución al conflictu, pero nes que González Rodríguez, Adrián Serrano, Eduardo López Rodríguez y Adrián Rey vinieron recibiendo numberoses amueses de solidaridá de compañeros –dende güei en fuelga indefinida– y de persones y coleutivos de dientro y fuera d’Asturies.

Primero foron los paseos solidarios diarios na sablera de L’Arbeyal, a la entrada d’El Musel, concentraciones na Xunta Xeneral o marches a la Campa Torres o a El Musel dende los Xardinos de la Reina, y hasta una caravana solidaria en coche. Ayeri les movilizaciones diaries treslladáronse a la plaza’l Marqués, tamién a les 20.30 hores, y pa esti xueves ta convocada otra frente al Parllamentu nacional a les 9.30 hores y una gran manifestación en Xixón con salida a les 19.30 hores de L’Humedal.

Na tarde d’ayeri González Rodríguez esplicó nun videu p’Asturies.com los motivos de la so reivindicación y la situación actual de les negociaciones. “Tamos bien físicamente y animícamente, fuertes de moral viendo tola solidaridá que se ta moviendo fuera”, rellata nel mesmu, y confirma que “tamos dispuestos a aguantar hasta que tengamos que salir d’equí o bien con un alcuerdu baxo’l brazu o bien nuna ambulancia pal hospital porque nun podemos más. Que lo tengan mui claro”.